Arrestimi i "gylenistëve", Haradinaj shkarkon ministrin e Punëve të Brendshme

Ikën edhe kreu e Agjencisë së Inteligjencës

Kryeministri

i Kosovës, Ramush Haradinaj shkarkoi dje ministrin e Punëve të Brendshme, Flamur Sefaj dhe kreun e Agjencisë Kosovare për Inteligjencën, Driton Gashi. Ky vendim vjen në përgjigje të arrestimit të 6 shtetasve turq, të cilët u deportuan në mënyrë të fshehtë dhe joligjore drejt Turqisë. Haradinaj ka sqaruar se aksioni është kryer si një bashkëpunim mes dy agjencive të inteligjencës, asaj turke dhe kosovare dhe se askush nuk kishte informacion për kryerjen e tij. Në shkresën zyrtare ku ka firmosur lirimin e menjëhershëm nga përgjegjësia të dy zyrtarëve, Haradinaj i konsideron veprimet e djeshme tërësisht të papranueshme dhe në kundërshtim me vlerat e parimet e popullit kosovar. Në seancën e djeshme të Kuvendit, kryetari i parlamentit, Kadri Veseli ka thënë se fajtorë janë të gjithë dhe se vala e shkarkimeve nuk duhet të përfundojë me kaq. "Kosova është shtet i pavarur, nuk mund të nëpërkëmbet në këtë mënyrë, nuk mbrojmë dot sigurinë dhe të drejtat e shtetasve tanë, ndihem i turpëruar, nuk kemi pasur informacion. U kërkoj falje familjeve.", tha ai. Më herët, presidenti turk Erdogan është zotuar sërish se do t'i ndjekë gylenistët kudo që të jenë dhe do t'i kthejë në shtetin turk për t'u kërkuar llogari. 6 shtetasit turq janë punonjës të Institucionit Arsimor "Gylistan". Ata u arrestuan me pretendimin se nuk kanë leje të vlefshme qëndrimi, një supozim ky i hedhur poshtë nga autoritetet. Arrestimi dhe deportimi i tyre është kryer tërësisht në kushte të paqarta. Familjarët e tyre dhe nxënësit e shkollave kanë protestuar, ata kërkojnë informacion, pasi nuk dinë asgjë se ku janë dërguar të arrestuarit.