PARALAJMËRIMI
Revokim i lejeve për subjektet që shkaktojnë ndotje akustike
Të
gjithë ata subjekte që do të shkaktojnë ndotje akustike gjatë sezonit të ri turistik, do t'u revokohet leja mjedisore. Ky është paralajmërimi që ka bërë ministri i Turizmit dhe Mjedisit, Blendi Klosi, ditën e djeshme gjatë takimit me drejtuesit e bashkive në qarkun e Vlorës. Ai theksoi se për të pasur një transparencë dhe zbatim sa më të mirë të ligjit, të gjitha bashkitë duhet të përgatisin hartën e caktuar se ku duhet lejuar ose jo muzika. "Në qytetin e Vlorës, në qytetin e Sarandës, në Himarë, kudo ku kemi zhvillim turistik ka vende që mund të lejohen zhurmat, natyrisht për një grupmoshë të caktuar, por ka zona që nuk duhet të lejohen zhurmat dhe prandaj ne duhet të bëjmë një hartë për të caktuar qartë ku do të lejojmë që të kemi muzikë,"- nënvizoi kreu i Turizmit e Mjedisit në fjalën e tij. Më tej ky i fundit bëri me dije se të gjitha subjektet që shkelin ligjin, do t'u revokohet leja e ushtrimit të aktivitetit. "Pra, ajo që ne duam të bëjmë gjatë këtij sezoni është që në bazë të planeve që do të përcaktojnë vetë bashkitë Ministria e Mjedisit do të revokojë lejet mjedisore për zhvillimin e aktivitetit në rast se zhurmat janë jashtë para parametrave të lejuar. Do të revokojmë lejen e ushtrimit të aktivitetit nga pikëpamja mjedisore atë që ne kemi target të fushës sonë për vendet që bashkia nuk lejon të zhvillohet aktivitet me një volum më të lartë akustik",- tha Klosi. Më tej ai shtoi se këtë vit pritet një turizëm cilësor, i cili kurrsesi nuk mund të jetë me zhurmë e theksoi se kjo është detyrë në bazë të ligjit e vetë bashkive, dhe do të monitorohet situate në mënyrë për të qenë sa më transparentë me biznesin.