Mosbindja civile, opozita bllokon rrugët për dy orë
Digjen gomat e makinave, incidenti i vetëm dhe përplasja me policinë në Milot Kreu i PD- së, këmbëkryq në mes të autostradës
Opozita protestoi dje paqësisht kundër tarifës për Rrugën e Kombit. Prej orës 10: 00 deri në orën 12: 00 deputetë të opozitës dhe mbështetësit u mblodhën në 4 kryqëzime kryesore të vendit: Vorë, Bradashesh, Milot dhe Çermë, duke bllokuar lëvizjen e automjeteve dhe duke i kërkuar Ramës të lirojë të arrestuarit e protestës së Rrugës së Kombit, të heqë tarifën e kalimit si dhe të heqë TVSH- në për biznesin e vogël. Kryetari i PDsë, Lulzim Basha dhe Luan Rama i LSI- së ishin në Vorë, ku u ulën këmbëkryq me protestuesit në autostradën Tiranë- Durrës, ndërsa kryetarja e LSI- së, Monika Kryemadhi ishte në Bradashesh të Elbasanit, ku protestuesit u vunë flakën gomave të makinave. Edhe në Milot ku ishte deputeti demokrat Flamur Noka u dogjën gomat e makinave. Në Çermë të Lushnjës ishin deputetët Enkelejd Alibeaj dhe Myslym Murrizi. Segmenti i parë rrugor që u bllokua nga protestuesit ishte kryqëzimi në Vorë. Protestuesit dolën në autostradë, por edhe në rrugët dytësorë në orën 9 e 40, duke mos lejuar kalimin e automjeteve. Mes qytetarëve ishin deputetët e Partisë Demokratike dhe Lëvizjes Socialiste për Integrim, ndërsa pak minuta më vonë u bashkua edhe Lulzim Basha bashkë me bashkëshorten Aurela. Protesta ishte e qetë, ndërsa Basha e shfrytëzoi për të diskutuar me qytetarët. Nuk munguan as foto selfie. Për t'u çlodhur, Basha u ul me protestuesit këmbëkryq në mes të autostradës. Policia qëndronte larg dhe nuk ndërhyri për asnjë moment. Ndërsa kishte qytetarë apo drejtues automjetesh të bllokuar që shikonin me kureshtje protestën, kishte nga ata që e shfrytëzuan kohën edhe për gjumë. Kishte edhe të revoltuar, pasi nuk kishin arritur të mbyllnin punët e tyre qoftë edhe për ceremoni mortore. Në Milot protestuesit e opozitës janë përplasur me policinë pas bllokimit të rrugës kryesore. Policia nuk lejoi që të bllokohet rruga, ndërsa Flamur Noka e cilësoi si provokim reagimin e forcave të rendit. "Ia kam komunikuar policisë. Ky është provokim që bën policia, Edi Rama ka uzurpuar shtetin", tha Noka. Ndërsa Bardh Spahia shtoi se, "protesta është paqësore dhe policia të mos provokojë". Ndërkohë që pas disa momenteve tension, situata është qetësuar, por rrua qëndroi e bllokuar deri në mbylljen e protestës. Në funksion të kësaj proteste opozita kërkoi që seanca plenare e parashikuar në orën 10: 00 të shtyhej në orën 18: 00. Ndërkohë, grupi parlamentar i LSI kërkoi nga Gramoz Ruçi që të përjashtojë nga punimet e Kuvendit kryeministrin Edi Rama, pasi ata pretendojnë se në seancën parlamentare të kaluar Rama ka përdorur fjalor fyes ndaj opozitës dhe qytetarëve, pas protestës në Rrugën e Kombit.