"Gati aeroporti me çmime të ulëta, nuk jam tërhequr nga taksa, po bisedojmë"
Kreu i qeverisë interpelancë me qytetarë të Kukësit
Kryeministri
zhvilloi dje, pas parlamentit një interpelancë me videokonferencë me qytetarë të Kukësit, të cilëve u premtoi se shumë shpejt do të përfitojnë edhe nga aeroporti, ku do të mund të zhvillohen fluturime me kosto të ulët. Në prani edhe të ministrit të Infrastrukturës dhe Energjetikës, Damian Gjiknuri, Rama u kërkoi ndjesë atyre për mosinformimin e duhur dhe mosbërjen në kohë të procesit të reduktuar të tarifimit për kalimin e banorëve të zonës në Rrugën e Kombit. "Ju kërkoj ndjesë, sepse pjesa e mosinformimit të saktë është pjesë e mospërgjegjësisë tonë. Mungesa e komunikimit, jo, sepse kemi qenë indiferentë, por për një arsye, nga njëra anë, sepse nuk e vlerësuam si duhet këtë fazë dhe nga ana tjetër, qysh në fund të shkurtit kemi nisur punën për një pikë të kontratës, që është pikërisht për ata që quhen përdorues të shpeshtë të rrugës. Pra, për ata që rruga është e domosdoshme për lëvizshmëri të lartë", shpjegoi Rama. "Kryetari i bashkisë Kukës nuk është i disatancuar nga dhuna, sot madje ka thënë se unë jam tërhequr nga tarifa dhe tani duhet të kërkoj lirimin njerëzve. Jetojmë në një shtet me pushtete të ndara, se kush ndalohet e kush gjykohet nuk është vendimmarrja ime, por e organeve ligjzbatuese. Thirrja për të liruar këta e ata, është një thirrje që shkon jo vetëm në adresë të gabuar, por shkon komplet në ajër",- tha Rama. "Kryetarit të Bashkisë Kukës i them që jo vetëm që s'jam tërhequr nga asgjë, por po vazhdojmë një proces që duhet ta kishim bërë më përpara. Për këtë kemi gabuar, kam kërkuar ndjesë. Nuk jemi si ata që bëjnë si të pagabueshëm dhe nuk kërkojnë ndjesë",u shpreh Rama.