Thirrja e Ramës për "ngritje", byroja rrëzon LSI, Hysi: Ishte poezi
Paloka: Skandaloze, e krahasoi popullin me organin gjenital
Byroja
parlamentare rrëzoi mbrëmë kërkesën e LSI- së për përjashtimin e Edi Ramës nga seanca me 6 vota kundër dhe 3 pro. Sipas mazhorancës, nuk pati fjalë fyese nga ana e kryeministrit në seancën e javës së kaluar. Nëntë deputetë të LSI- së i kërkuan kreut të Kuvendit, Gramoz Ruçi, përjashtimin e kryeministrit Rama nga Kuvendi për fjalorin e përdorur në seancën parlamentare të 29 marsit. Më konkretisht, në fjalën e tij gjatë zhvillimit të kësaj seance, kryeministri është shprehur: "Nuk mundni dot ju të bllokoni asgjë dhe të pengoni asgjë dhe për më tepër pastaj, jo po…, shiko këtu se do të ngrihen këta, do ngrihen ata. Kjo e ngritjes është, ' thirri- thirri të të ngrihet, ai i shkreti kokulur s'të përgjigjet dot'. Por deputetja Vasilika Hysi habiti teksa tha se kjo ishte një poezi e thënë nga z. Rama. "Ai vetë thotë; ' po ju lexoj një poezi'. Në gjuhën shqipe disa fjalë mund të marrin dy kuptime. Kolegët e opozitës nuk bënë asnjë kërkesë për 7 ditë, ndaj kjo ishte një lëvizje tjetër e opozitës", tha Hysi. Nënkryetari i Kuvendit, deputeti demokrat Edi Paloka e quajti rastin më skandaloz mospërjashtimin e kryeministrit Edi Rama nga byroja, duke rrëzuar kështu kërkesën e LSI- së. Paloka tha se nuk ka ndodhur kurrë që një kryeministër të quajë organ gjenital popullin e tij, por sipas tij, mazhoranca përdori të gjitha argumentet absurde për ta mbrojtur. LSI e barazon fjalorin e kryeministrit Rama me atë të një rrugaçi duke kërkuar përjashtimin në bazë të rregullores së Kuvendit me 10 ditë nga seanca plenare, por për PS nuk ka pasur fjalë fyese.