Lazarat, tritol banesës së të dënuarit për vrasjen e efektivit të RENEA- s
Banorët: Jemi terrorizuar nga ajo që ndodhi, Ademi nuk është person problematik Adem Selimi: U terrorizuam, s'kam konflikte me askënd
Tronditet Lazarati. Banesa e një prej të dënuarve për vrasjen e efektivit të RENEA- s, Ibrahim Basha u sulmua me tritol në orët e para të mëngjesit të djeshëm. Bëhet fjalë për shtëpinë e Klodian Selimit, i dënuar me 13 vjet burg. Burime zyrtare nga Drejtoria e Policisë së Qarkut të Gjirokastrës bënë me dije se ngjarja e rëndë ndodhi rreth orës 02: 30. Mësohet se lënda plasëse ishte vendosur në derën e jashtme të banesës së Adem Selimit, babait të Klodianit. Fatmirësisht nga shpërthimi i eksplozivit janë shënuar vetëm dëme materiale dhe nuk ka pasur persona të lënduar. Menjëherë blutë kanë shkuar në vendngjarje dhe kanë nisur hetimet për identifikimin dhe vënien në pranga të autorëve të krimit.
NGJARJA
Adem Selimi dhe pjesëtarët e familjes së tij ( bashkëshortja, djali dhe nusja) ishin në gjumë kur kanë dëgjuar një zhurmë të tmerrshme. Të terrorizuar ata kanë shpejtuar të dalin jashtë, kur kanë parë se kati i parë i banesës 2 katesh kishte pësuar dëme të shumta materiale. Menjëherë është sinjalizuar policia, e cila ka shkuar në vendngjarje dhe ka kryer veprimet e para hetimore. Më pas blutë kanë shoqëruar dhe marrë në py- etje të zotin e banesës, njëherësh edhe shënjestër e atentatit. Ai ka deklaruar se nuk ka konflikte me askënd dhe se nuk e di motivin e këtij sulmi. Burimet e mësipërme pohuan se Adem Selimi nuk është person i skeduar, me të kaluar të dyshimtë apo me precedent penal. Ai njihet si person i qetë dhe pa probleme në Lazarat. Ndërkaq, sulmi me tritol ka shkaktuar panik tek banorët e fshatit Lazarat. "Jemi terrorizuar nga ajo që ndodhi. Ademi merret me bujqësi dhe blegtori. Ai është person jo problematik dhe shikon punën e tij. Nuk e dimë se kush i vuri tritol banesës së tij",- thanë disa banorë të Lazaratit.
HETIMET
Burime pranë grupit heti- mor pohuan se shënjestra e sulmit, ishte banesa e Adem Selimit. Ky i fundit është babai i Klodian Selimit, një nga personat e dënuar me 13 vite burg për vrasjen e efektivit të RENEA- s Ibrahim Basha. Klodian Selimi ka qenë pjesë e grupit të zjarrit në Lazarat, që vranë efektivin Ibrahim Basha afro tre vite më parë. I riu bashkëpunoi me prokurorinë për zbardhjen e ngjarjes ku humbi jetën oficeri i RENEA- s, ndaj dhe dyshohet që ky të ketë qenë dhe shkaku i vënies së tritolit në shtëpinë e familjes së Klodian Selimit. Ngjarja në fjalë ndodhi më 24 qershor të vitit 2015 në Lazarat ku gjatë shkëmbimit të zjarrit mes grupit të zjarrit dhe policisë mbeti i vrarë efektivi Basha.