Grabitet banesa e këngëtarit Lefteris Pantazis, mediat greke: Autorët dyshohen të jenë shqiptarë
Rrihet barbarisht dhe biznesmeni Aleksandros Stamatiadis
GREQI - Rrahja brutalisht e biznesmenit grek Aleksandros Stamatiadis nga dy grabitës që ishin futur në shtëpinë e tij në Athinë ka ngritur policinë në këmbë. 52- vjeçari kaloi në gjendje kritike për jetën, pasi u godit nga dy grabitësit me shufër hekuri. Dy ditë më parë ai kishte ndjerë grabitësit që ishin futur në shtëpi, ndërsa familja e tij ishte në gjumë. Mjekët në spitalin "Georgios Gennimatas" të Athinës kryen të paktën dy operacione, ndërsa 52vjeçari kishte goditje të shumta në kokë dhe disa organe. Autoritetet greke e lidhin sulmin e biznesmenit edhe me grabitjen që ndodhi në banesën e këngëtarit të njohur Lefteris Pantazis. Ky i fundit, ndonëse është nga këngëtarët e preferuar grekë për shqiptarët, duket se kjo gjë nuk ka arritur ta heqë nga shënjestra e grabitësve, po shqiptarë. Banesa e këngëtarit të njohur Lefteris Pantazis në Vouliagmeni është grabitur mbrëmjen e së shtunës nga dy persona, të dyshuar si shqiptarë, të cilët dyshohet se janë autorë edhe të grabitjes së banesës së biznesmenit Aleksandros Stamatiadis, i cili mbeti i plagosur rëndë. Lefteris Pantazis është i njohur në Shqipëri për shkak edhe të bashkëpunimit me këngëtarin Devis Xherahu. Mediat greke shkruajnë se dy persona të maskuar hynë në shtëpinë e Pantazis dhe kërcënuan punonjësit rusë duke iu marrë 1000 euro, ora dhe bizhuteri me vlerë. Duke folur për mediat, këngëtari tha se vjedhja ndodhi edhe pse shtëpia e tij ishte 50 metra larg nga stacioni i policisë Vouliagmeni. Lefteris Pantazis tregoi se punëtorët kishin qenë në gjumë dhe hajdutët ishin futur nga kuzhina, pasi dera nuk ishte e mbyllur mirë dhe alarmi nuk kishte funksionuar. "Vajzat flinin, ata mbanin armë në duar dhe morën 1.000 euro, por fatmirësisht vajzat janë mirë", tha këngëtari. Vetë Pantazis nuk ishte në shtëpi, pasi ndodhej në Larisa për punë. Deri tani, nga laboratorët e mjekësisë ligjore nuk është marrë ndonjë provë që do hidhte dritë mbi hetimet, ndërsa nga ajo që kanë thënë në një fazë të parë dëshmitarët okularë nuk jepen shumë të dhëna për profilin e autorëve. "Me të dhënat e deritanishme, dyshohet se autorët janë të huaj, sipas të gjitha gjasave shqiptarë dhe i kanë zgjedhur rastësisht objektivat e tyre", shkruan "Prothothema", e cila thotë se policia e lidh grabitjen e Lefteris me rrahjen e një biznesmeni. Sipas policisë, autorët kishin veshur doreza dhe kapuça, që u mbulonin plotësisht fytyrat.