Turqi, sulm me armë, 4 të vdekur
Dogukan B ishte shkarkuar nga detyra pasi dyshohej se ishte pjesë e një organizate terroriste Arrestohet autori, studiues në Universitetin Eskisehirit
Një sulm me armë ka ndodhur gjatë ditës së djeshme në Universitetin e Eskisehirit, në veriperëndim të Turqisë ku kanë mbetur katër të vrarë dhe tre të plagosur. Mediat turke bëjnë me dije se agresori është Dogukan B. studiues në Universitetin e qytetit Osmangazi. Autori i sulmit për motive ende të panjohura qëlloi për vdekje katër kolegë të tij.
NGJARJA
Gjatë mesditës se djeshme Dogukan B studiues në Universitetin e Eskisehirit ka qëlluar me armë zjarri pjesëtarët e stafit të universitetit duke lënë të vrarë 4 persona dhe 3 të tjerë të plagosur. Rektori i universitetit tha se viktima të këtij sulmi kanë rënë zv. dekani i Fakultetit të Edukimit, Mikail Yalcin; sekretari i Fakultetit Fatih Ozmutlu; lektori Serdar Caglak dhe ndihmës lektori Yasir Armagan. Tre të plagosurit nga sulmi janë transferuar menjëherë në spital. Doukan B. është arrestuar pasi është dorëzuar vullnetarisht. Sipas rektorit të universitetit, Hasan Gonen agresori mësyu fillimisht zyrën e dekanit dhe qëlloi një person aty brenda më pas, ai qëlloi edhe 3 pjesëtarë të tjerë të stafit, në katet e mësipërme të ndërtesës, përpara se të largohej nga godina. Punonjësit e emergjencës shkuan menjëherë në vendngjarje, për t'iu ardhur në ndihmë studentëve dhe pedagogëve të tjerë të shokuar. Motivi i këtij sulmi mbetet ende i paqartë, ndërkohë guvernatori i provincës Ozdemir Cakacak ka emëruar tre prokurorë për të hetuar dhe zbardhur ngjarjen e rëndë. Sipas raportimeve bëhet me dije se asistenti i kërkimeve shkencore ishte shkarkuar nga detyra. Shkak i shkarkimit ishin dyshimet se Dogukan B ishte pjesë e një organizate terroriste të quajtur fethyllahiste.