Pagesa për Rrugën e Kombit, Meta: Ky vend qëndron nga taksapaguesit

Presidenti bën thirrje për qetësi dhe dialog mes opozitës e qeverisë "Tensionet? Nuk kemi luksin të këpusim asnjë ' lule'"

Presidenti i Republikës, Ilir Meta i kërkoi dje qeverisë dhe opozitës të dialogojnë për të shmangur tensionet e panevojshme. Nisur nga protestat e ditëve të fundit, organizuar nga opozita në mbështetje të qytetarëve që kundërshtojnë taksën e rrugës Durrës- Kukës, presidenti u shpreh dje për mediat se këto konflikte që nuk i shërbejnë as vendit dhe as qytetarëve. I pranishëm në takimin ' Aleanca Kombëtare e Studentëve Senatorë', Meta u shpreh se jetojmë në një klimë konfliktualiteti, arrogance dhe arbitrariteti. "Jetojmë në një klimë të papranueshme konfliktualiteti dhe përjashtimi, arbitrariteti dhe arrogance. Besoj se jam përpjekur të jap mesazhet e duhura. Megjithatë, dua të theksoj se ne nuk e kemi luksin as ' të këpusim një lule', meqenëse ato kanë filluar të çelin për shkak të pranverës dhe për shkak edhe të dëmeve që vendi ka pësuar në të kaluarën nga mungesa e dialogut dhe nga fryma e përjashtimit dhe konfrontimit", tha presidenti. Ai shtoi se, "është e domosdoshme që çdo vendim që ka të bëjë me qeverisjen të jetë i mirëstudiuar dhe i mirëkonsultuar dhe është e drejtë e çdo qytetari, e çdo komuniteti të kërkojë dhe të forcojë ndjenjën e llogaridhënies ndaj qeverisjes qendrore edhe vendore për çdo taksë që paguajnë apo për çdo shërbim që duhet të udhëtohet. Megjithatë - tha më tej - presidenti, shpresoj në një reflektim të përgjithshëm dhe në vendosjen e një dialogu, i cili ndihmon në përmirësimin e mirëqeverisjes së vendit dhe besimit dhe respektimit tek institucionet e përbashkëta. Besoj se mesazhi im ka qenë dhe mbetet i qartë. Opozita ka të gjitha mundësitë që të shfrytëzojë instrumentet e saj për të rritur kontrollin parlamentar, ashtu sikurse mazhoranca duhet të jetë më e interesuar për dialog të qëndrueshëm me opozitën, grupet e interesit, me komunitetet, me qytetarët në mënyrë që të evitohet çdo shkak për tensione të panevojshme dhe për konflikte që nuk i shërbejnë as vendit, as qytetarëve dhe as një qeverisjeje më të mirë dhe as një demokracie për të cilën të gjithë duhet të kontribuojmë më shumë", theksoi kreu i shtetit. I pyetur se si i gjykon thirrjet e opozitës për

mospagim taksash, Meta u shpreh kundër, pasi shteti sipas tij mbahet nga taksat. "Mendoj se ky vend qëndron në bazë të kontributit të çdo qytetari në radhë të parë, por edhe të çdo taksapaguesi. Dhe në këtë drejtim edhe qeveria, por edhe opozita duhet të rri-

sin bashkëpunimin dhe transparencën në respekt të qytetarëve shqiptarë në radhë të parë dhe të gjitha kërkesave dhe pretendimeve të tyre, por edhe të taksapaguesve shqiptarë, të cilët mbajnë edhe shtetin, edhe institucionet", theksoi Meta. Partia Drejtësi Integrim dhe Unitet kërkoi dje nga qeveria të heqë tarifën prej 5 euro për autoveturat dhe 22 euro për kamionët në Rrugën e Kombit. Kjo parti bën thirrje për një pakt kombëtar e dakordësi të munguar në këtë tranzicion të gjatë për integrimin europian.