Trafikuan shqiptarë në SHBA, Kanada dhe Britani, 39 të arrestuarit kërkojnë lirinë në Apel
Klandestinë me pasaporta false, ja si varionin pagesat
Në
kuadër të goditjes së kontrabandimit të personave me qëllim emigrimin drejt SHBA, Kanadasë dhe Mbretërisë së Bashkuar pak javë më parë ranë në pranga 39 persona, mes tyre 4 policë ndërsa u shpallën në kërkim 12 të tjerë. Ditën e djeshme 39 personat e arrestuar si pjesë e rrjetit të trafikut të klandestineve kanë apeluar masën ' Arrest me burg' nga Shkalla e Parë, duke kërkuar lirinë në apel. Kjo organizatë kriminale, e cila dërgonte shtetas shqiptarë drejt tri destinacioneve kryesore u godit pas një hetimi disa mujor nga Prokuroria për Krime të Rënda. Kundrejt pagesave, të cilat varionin nga 7 mijë paund deri në 2530 mijë dollarë, grupet kriminale, pajisnin qytetarët me pasaporta të falsifikuara të vendeve të BE- së e në këtë mënyrë, ata udhëtonin drejt destinacioneve në katër rrugë kryesore. Rruga kryesore e kalimit të qytetarëve, ishte nga Shqipëria në Itali- Francë- Meksikë e më pas në Shtetet e Bashkuara të Amerikës. Rruga e dytë që ndiqej ishte ajo nga vendi ynë në Malin e Zi, më pas në Serbi e Gjermani. Prej andej qytetarët udhëtonin drejt Spanjës. Nga këtu përshkonin dy rrugë. Kishte prej tyre që kalonin në Meksikë me destinacion final SHBA, ndërsa të tjerë kalonin përmes Kosta Rikës. Një rrugë tjetër e ndjekur nga trafikantët, ishte ajo e kalimit përmes Kosovës, prej andej qytetarët udhëtonin drejt Bullgarisë ose Belgjikës. Nga kjo e fundit kalonin në Republikën Domenikane e prej andej në Kanada. Ata që kalonin nga Bullgaria, udhëtonin drejt Spanjës dhe përmes Kosta Rikës hynin në Shtetet e Bashkuara të Amerikës. Policia shqiptare bën me dije se për shkatërrimin e kësaj linje rol vendimtar kanë luajtur edhe 2 agjentët speciale të Shërbimit Diplomatik të Sigurisë së Departamentit Amerikan të Shtetit, të atashuar pranë ambasadës së SHBA- ve në Tiranë.