"Si u përballa me vrasësin e vëllait, Albert Zekaj nuk më shikonte në sy"
"Ngjarja, jo për lekët e qirasë. Mund të jenë përfshirë edhe persona të tjerë" Kreshnik Beqiraj: Për zbulimin e autorit të krimit më ndihmuan shumë dëshmitarë
Ndonëse shumë i ri, Donjet Beqiraj arri ti të çojë pas hekurave vrasësin e vëllait të tij. Afro një muaj pas gjetjes së eshtrave të 36- vjeçarit Kreshnik Beqiraj që u masakrua nga shoku i tij, Albert Zekaj, vëllai i viktimës ka rrëfyer dje në emisionin "Me zemër të hapur" në "News 24" përballjen me vrasësin. Ai tha se ka bërë një takim të shkurtër me Zekajn, ku e ka pyetur për të vëllain, por ai nuk e ka parë asnjë herë në sy. "Me bashkëpunimin e prokurorisë kam pasur një kontakt shumë të vogël me Albert Zekaj. Ishte ndihmë për shtetin. Kishte 7 muaj që na shmangej. Daja im e kërkoi dhe ai u largua, vajti në Tiranë. Takimi im me të ka qenë i shkurtër, por ka qenë përfundimtar. Ndodhi ditën kur pranoi krimin, në policinë e Fierit. Gjatë përballjes me mua, ai shikonte tavanin, tokën, majtas djathtas. Nuk më shikonte në sy. E pyeta ku është vëllai im, pse nuk më je përgjigjur. Nuk m'u përgjigj. Bëra shumë durim, isha i përmbajtur. Qetësinë e gjeta tek ajo që doja të gjeja vëllain tim. Për të bërë keq është shumë kollaj. Me agresivitet nuk fiton kurrë", tha 26vjeçari Donjet Beqiraj. Ndërkaq, ai u shpreh se për zbulimin e vrasësit e kanë ndihmuar shumë dëshmitarë, por edhe rrethanat. Kjo, pasi banesa ku jetonin Kreshniku me Albertin ishte në një zonë të populluar të qytetit të Fierit. "Të gjithë dëshmitarët kanë ardhur me karta identiteti në policinë e Fierit për të ndihmuar. Pallati ku jetonte vëllai me autorin e krimit është në qytetin e Fierit. Një pallat i ri, afër me godinën e Tatimeve dhe një zyrë shtetërore. Është pozicion i vështirë që të bësh lëvizje pa parë njeri gjë. Është një lagje e populluar. Ka shumë lëvizje. Kishte kamera sigurie tek pallati. Kur nuk u pa vëllai dhe panë Albert Zekaj që lëvizte me mjetin e vëllait tim, iu ra shumë në sy. Atë ditë që u bë vrasja ky ( Albert Zekaj) nuk është parë katër ditë në lagje. Rrethi shoqëror ndihmoi shumë për këtë çështje", tha Donjeti. Gjithashtu, ai tregoi se vëllai i tij dhe Alberti ishin njohur në një kamp kthimi në Belgjikë dhe se Kreshniku i kishte ofruar ndihmë dhe e kishte strehuar për rreth 2 vjet. "Vëllai me vrasësin kishin 2 vjet që ishin njohur në një kamp kthimi në Belgjikë. Vëllai im i ka ofruar ndihmë Albertit se kishte probleme familjare. Por kohët e fundit vëllai i kishte thënë shokut të tij që të dilte nga shtëpia, sepse nuk e mbante dot më. Kohët e fundit nuk kanë shkuar mirë me njëri- tjetrin. Por mendoj që vrasja nuk është për lekët. Nuk ma merr mendja se të gjitha i ka bërë vetë Alberti", pohoi vëllai i viktimës. Donjet Beqiraj ende po kërkon pjesët e pagjetu- ra të trupit të të vëllait të tij. Koka dhe disa pjesë të tjera ende nuk janë mbledhur dhe i vëllai po kërkon me miqtë për t'i kryer ceremoninë mortore. Më 7 mars të këtij viti, një trup i pajetë u gjet i groposur në fshatin Daullas të Fierit. Për këtë ngjarje u arrestua 32- vjeçari Albert Zekaj nga Malësia e Madhe, i cili gjatë marrjes në pyetje tha: "Unë jetoja në një shtëpi me qira me Beqirajn. Ne kishim probleme me pagesën e qirasë që prej një viti. I kërkova lekët, por ai më tha se nuk kam. Atë natë që ndodhi ngjarja kam qenë i dehur. Kreshnikun e godita disa herë me çekiç në kokë dhe pas 3 ditësh e copëtova dhe e groposa".