Bushati kërkon ndjesë për ujin në Kuvend, Rama: Nuk jemi si opozita
Progres- raporti për Shqipërinë, Mogherini e Hahn në Tiranë më 7 prill Ministri: Basha e Kryemadhi ndihen keq për çeljen e negociatave
Përfaqësuesja e Lartë e Bashkimit Europian për Punët e Jashtme dhe Politikën e Sigurisë dhe zv. presidente e Komisionit Europian, Federica Mogherini dhe Komisioneri Europian për Zgjerim, Johanes Hahn pritet të vijnë në Tiranë pikërisht më 17 prill. Ndërsa pritet që atë ditë Komisioni Evropian të japë rekomandimin e tij për nisjen e bisedimeve me Shqipërinë për negociatat e anëtarësimit në BE, dy drejtuesit e lartë do t'u dorëzojnë autoriteteve shqiptare progres- raportin e KE- së. Pritet që ky raport të jetë pozitiv për Shqipërinë, ndërkohë që më tej do të duhet vendimi i vendeve anëtare të BE- së për t'u mbushur atyre mendjen të votojnë "pro" hapjes së negociatave. Ndërkohë dje, ministri për Evropën dhe Punët e Jashtme, Ditmir Bushati deklaroi pas seancës së rrëmujshme të parlamentit se askush nuk mund të djegë rrugëtimin evropian të shqiptarëve. "Shqipëria i ka përmbushur detyrat e shtëpisë për marrjen e rekomandimit të shumëpritur dhe askush nuk mund ta djegë këtë stacion të ri të rrugëtimit tonë europian", u shpreh Bushati, ndërsa kërkoi ndjesë për veprimin e tij në Kuvend. Po për këtë reagoi dje edhe kryeministri Edi Rama. "Ditmir Bushati reagoi sot ( dje) instinktivisht ndaj një agresioni të shëmtuar dhe gaboi. Kërkoi ndjesë publike e prapëseprapë u ndëshkua. Sepse për ne rregullat vlejnë njësoj për të gjithë dhe ne nuk jemi njësoj si ata që jo vetëm s'e njohin ndjesën, po janë krenarë për shëmtitë e tyre!", u shpreh Rama. Gjatë seancës së djeshme, ministri Bushati u hodhi ujë deputetëve të opozitës. Për këtë ai u shpreh në një status në rrjetin social "Facebook": "Dua të pranoj që në fillim se jam i keqardhur për reagimin tim instinktiv ndaj agresionit të ulët me miell, vezë e të tjera mjete rrethanore, nga grupi i pushtuesve të dhunshëm të foltores së Kuvendit, pa llogaritur lumin e të
sharave vulgare! U kërkoj ndjesë qytetarëve për faktin që nuk arrita të ruaj gjakftohtësinë në ato kushte krejt të papranueshme për çdo mjedis publik, e lëre më pastaj për një Kuvend demokratik. Por - vijoi ministri më tej - reagimi im në atë skenë ku ligësia e verbërisë politike është ulur këmbëkryq duke na turpëruar të gjithëve, edhe njëherë tjetër në sytë e
prindërve e të fëmijëve të këtij vendi, as nuk e fshin as nuk e lehtëson barrën e rëndë të përgjegjësisë së dhunuesve recidivë të bashkëjetesës parlamentare. Të cilët ushqejnë publikun me farmakun e gjuhës vulgare, duke u bërë shembulli udhëheqës për çdo rrëmujaxhi e shkatërrues potencial të aspiratave të qytetareve të zakonshëm të këtij vendi". "Njësoj siç tentuan të bllokojnë reformën në drejtësi me çdo mjet dhe siç tentuan të shkatërrojnë zgjedhjen për të bllokuar vetingun, ata sot po tentojnë të bllokojnë të ardhmen e Shqipërisë Evropianë. Nuk ia dolën atëherë, nuk do t'ia dalin dot as tani. Edhe njëherë ndjesë për çka unë personalisht nuk munda të evitoj sot", tha dje Bushati.
"Salla e Kuvendit, nga një hapësirë ku, si në çdo vend të botës demokratike, duhet të triumfojë debati i civilizuar, është kthyer nga Lulzim Basha dhe Monika Kryemadhi në një skenë turpëruese, ku opozita me çdo kusht kërkon të vrasë fjalën argumentin dhe vetë ligjësitë e bashkëjetesës demokratike", nënvizoi ministri. "Javën e ardhshme Shqipëria dhe
shqiptarët presin një lajm të një rëndësie të posaçme: Rekomandimin e Komisionit Evropian për çeljen e negociatave të Shqipërisë me Bashkimin Evropian. Në vend që të ishim sot të gjithë bashkë, për këtë sukses të Shqipërisë, jo të qeverisë, të shqiptarëve pa dallim, jo të një pale në Kuvend, jemi të ndarë keqas nga një opozitë që investohet çdo ditë e më shumë
për ta kthyer këtë vend në një problem për miqtë e partnerët e Shqipërisë", theksoi ai. "Është e qartë: Sa më shumë i afrohemi BE- së, sa më të shumta e konkrete bëhen rezultatet e reformave dhe veçanërisht të Reformës në Drejtësi dhe Vetingut, aq më keq ndjehen dhe sillen me vetë Shqipërinë, Lulzim Basha e Monika Kryemadhi", tha Bushati.