Akuzat e Llallës në Kongres, Lu i shkon në zyrë Ilir Metës
60 minutat e bisedës mes ambasadorit amerikan dhe presidentit Shefi i kabinetit, Cici: Takimi, miqësor e bashkëpunues
Ambasadori amerikan në Tiranë, Donald Lu, i shkoi dje në zyrë Presidentit të Republikës, Ilir Meta, një ditë pas zbardhjes së letrës që ishkryeprokurori Adriatik Llalla i kishte drejtuar Kongresit Amerikan. Në këtë letër thuhej se Donald Lu i ka kërkuar Llallës arrestimin e Ilir Metës. Ndërkohë pas këtij takimi, që zgjati rreth një orë, Presidenca sqaroi përmes drejtorit të kabinetit, Arben Cici se fokusi i bisedës mes Lu dhe Metës ka qenë te marrëdhëniet dypalëshe si dhe ecuria e Reformës në Drejtësi. Interesit të mediave lidhur me takimin e sotëm mes Presidenti Meta dhe ambasadorit Lu, drejtori i Kabinetit të Presidentit, Arben Cici u shpreh: "Presidenti i Republikës, Ilir Meta priti sot në një takim ambasadorin e SHBA- ve në Shqipëri, Donald LU me të cilin diskutuan mbi marrëdhëniet e shkëlqyera mes dy vendeve tona dhe mbi çështjet aktuale të sigurisë rajonale dhe ndërkombëtare. Në kuadër të integrimit evropian të Shqipërisë, çështjes së rëndësishme të hapjes së negociatave u nënvizua rëndësia e ecurisë dhe implementimit të reformës në drejtësi dhe u shkëmbyen mendime rreth situatës aktuale në vend. Fryma e përzemërt, miqësore dhe bashkëpunuese karakterizoi, ashtu si gjithmonë këtë takim", thuhet në reagimin e Cicit. Por, ky takim vjen vetëm një ditë pasi u publikua letra që Llalla i kishte nisur Kongresit Amerikan e ku denoncoi ambasadorin amerikan, Donald Lu për presione në ushtrimin e detyrës së tij si Kryeprokuror i Republikës dhe që për më tepër i kishte kërkuar të prangoste kryetarin e atëhershëm të Kuvendit dhe të LSI- së. "Për më tepër, në një
mënyrë jodiplomatike dhe kundër çdo norme të garantuar nga Konventa e Vjenës, ambasadori Lu i sugjeroi Prokurorit të Përgjithshëm se duhet të arrestonte kryetarin e parlamentit dhe gjithashtu kryetarin e Lëvizjes Socialiste për Integrim, Ilir Meta", thuhet në letrën e Llallës. Por, vetë Lu reagoi duke thënë se Llalla gënjen. "IshProkurori i Përgjithshëm, Llalla është një zyrtar pub-
lik i korruptuar dhe diskredituar, i cili është nën hetim aktiv për pastrim parash dhe pasuri masive të pashpjeguara. Nuk është për t'u habitur që vazhdon të flasë kundër reformës në drejtësi, sepse tani rrezikon të shkojë në burg për korrupsionin e tij", u shpreh Lu. "Ai ka pretenduar se brenda katër muajsh nga mbërritja ime në Tiranë, unë i paskam thënë të arrestojë ish- kryetarin e
Kuvendit, Ilir Meta. Kjo është një gënjeshtër absurde nga z. Llalla, pa kurrfarë baze në fakte. Gënjeshtra e tij fyese është një ofendim për Presidentin Meta dhe popullin shqiptar", tha dje Lu. Adriatik Llalla po hetohet nga Prokuroria e Durrësit për fshehje pasurie, pastrim parash etj., ndërsa pak javë më parë u shpall non grata nga SHBA për shkak të akuzave si i korruptuar.