Zguri: Administrimi i zgjedhjeve, ka ardhur koha për ndryshime epokale

Kreu i KQZ- së raporton në Kuvend: Duhet reformë e thellë

Kreu

i KQZ- së, Klement Zguri kërkoi dje reformim të thellë të administrimit zgjedhor. Gjatë raportimit në seancën e djeshme parlamentare, Zguri tha se parlamenti duhet të bëjë ndryshime epokale përsa i procesit zgjedhor dhe të largohet nga administrimi politik i tyre. "Rekomandimet e OSBE/ ODHIR, por edhe administrimi i procesit zgjedhor nga KQZ- ja nxjerrin në pah domosdoshmërinë e rregullimit të legjislacionit, që rregullon organizimin dhe administrimin e zgjedhjeve. Administrimi i zgjedhjeve kërkon reformë të thellë. Ka ardhur koha për ndryshime epokale. I takon këtij parlamenti të themelojë epokën e administrimit profesional të zgjedhjeve dhe të largohet nga administrimi politik i tyre", u shpreh Zguri. Sipas tij, "praktika ka treguar se ndikimi i partive politike tek komisionerët e niveleve të dyta dhe të treta ka shkaktuar probleme në çdo proces zgjedhor gjatë ditës së votimit dhe numërimit të votave. Propozimi i komisionerëve nga ana e partive politike në kapërcim të afateve ligjore, ka sjellë trajnim jo të duhur dhe në disa raste mungesë trajnimi për ta. Ndërrimi i tyre vetëm disa orë para fillimit të procesit të votimit, apo procesit të numërimit ka bërë që komisionierët e trajnuar të zëvendësoheshin me komisionerë të patrajnuar. Kjo ka ndikuar në mënyrë të drejtpërdrejtë në administrimin e procesit", tha Zguri. Ai ngriti edhe çështjen e financimit të partive politike dhe fushatave zgjedhore, e cila sipas kreut të KQZ- së meriton vëmendje të veçantë gjatë reformës.