Gjoba tregtarëve në Shkodër, Krimet e Rënda dënojnë 4 të pandehurit
Prokuroria: Krijuan një skemë përfitimi të paligjshme, duke u marrë pagesa bizneseve private Në total 43 vite heqje lirie për të akuzuarit
Në vijim të procesit gjyqësor për të aku zuarit për gjobëvënie ndaj tregtarëve dhe biznesmenëve në Shkodër, Gjykata e Krimeve të Rënda shpalli ditën e djeshme vendimin përfundimtar për katër nga 7 të arrestuarit. Katër të pandehurve u është ulur një e treta e masës së dënimit, pasi përfituan nga gjykimi i shkurtuar. Konkretisht, Muhamet Lici, i cili është konsideruar më herët si kreu i grupit kriminal u dënua me 13 vite burg, Abedin Bajraktari me 11 vite burg, Besmit Domnori me 9 vite burg dhe Denis Skutina me 10 vite burg. Më herët Prokuroria e Krimeve të Rënda dorëzoi në gjykatë dosjen për 7 anëtarët e grupit të gjobëvënësve, të cilët shantazhonin tregtarët në Shkodër. Sipas organit të akuzës, të pandehurit u vendosnin gjoba 1000 deri në 3000 lekë tregtarëve për të mbrojtur dyqanet në tregun e Shkodrës. Operacioni për goditjen e këtij grupi u realizua në mars të vitit 2017, megjithëse disa nga tregtarët thanë se paratë ua kanë dhënë me dëshirën e tyre për t'u ruajtur dyqanet.
ARRESTIMI I GJOBËVËNËSVE
Më datë 04.03.2017 u finalizua operacionin policor i koduar "ILLEGAL BILLS", ku ranë në pranga gjobëvënësit e tregtarëve nga shërbimet e Drejtorisë Vendore të Policisë Shkodër. Ky operacion policor është përmbyllur në kuadër të një hetimi 6mujor të zhvilluar nga shërbimet e specializuara të Drejtorisë Vendore të Policisë së Shkodrës, në bashkëpunim me Prokurorinë pranë Gjykatës së Shkallës së Parë për Krimet e Rënda, Tiranë. Të pandehurit akuzohen për kryerjen e veprave penale "Shtrëngim me anë të kanosjes për marrjen e pa- surisë" dhe "Krijimit të grupit të strukturuar kriminal". Grupi i gjobëvënësve përbëhej nga shtetasit Muhamet Mustafa Lici, i vitlindjes 1992, lindur dhe banues në Lagjen "Guerrile" Shkodër, i dënuar më parë me 4 vjet e 8 muaj burgim për veprën penale të "Prodhimit dhe mbajtje pa leje të armëve dhe municionit luftarak"; Abedin Eljaz Bajraktari, i vitlindjes 1990, lindur dhe banues në lagjen "Guerrile" Shkodër, në gjendje gjyqësore "i dënuar"; Denis Zaim Skutina, i vitlindjes 1993, në Shkodër dhe banues në Lagjen "Naim Gjylbegu"; Shtetasi G. S., i vitlindjes 2000, lindur dhe banues në Lagjen "Naim Gjylbegu", Shkodër; Besmir Merzuk Domnori, i vitlindjes 1993, lindur dhe banues në Lagjen "Qemal Stafa" Shkodër; Gëzim Ragip Vajushi, i vitlindjes 1960, i lindur e banues në lagjen "Ahmet Haxhia", i dënuar; Fatmir Vehbi Dibra, i vitlindjes 1964, lindur dhe banues në lagjen "Kongresi i
Përmetit", Shkodër. Këta shtetas në bashkëpunim me njëri- tjetrin, me anë të shtrëngimit, dhunës dhe kanosjes kishin ngritur një skemë përfitimi të paligjshëm duke u marrë pagesa çdo muaj bizneseve private, të cilat ushtronin aktivitetin në zonën e njohur si "Tregu i Zdrales" dhe "Rruga e Gjenë e Kirasit", Shkodër. Gjatë kontrolleve të banesave, janë sekuestruar në cilësinë e provës materiale dy automjete, një autoveturë "Mercedez Benz" i blinduar dhe një autoveturë "Fiat", 7 telefona celularë, 6 uniforma kamuflazhi, një targë automjeti BP 1065 HT, një palë dylbi, tri skafandra motori, një sasi lënde narkotike e llojit kanabis sativa, fletore shënimesh, me shënime të emrave të personave dhe lekët.