Klerikët e Shkodrës: Droga, fajdet dhe lojërat e fatit po shkatërrojnë familjen
"Njerëzit e botës së krimit po deformojnë tregun me paratë e pista" "Shteti të mbrojë tabanin kombëtar nga degjenerimi, korrupsioni, shthurja dhe imoraliteti"
Droga, fajdet dhe lojërat e fatit, fenomene këto që kanë tronditur dhe po tronditin shoqërinë shqiptare gjatë 28 viteve të fundit kanë mbledhur në një takim të përbashkët drejtuesit e tri komuniteteve fetare në Shkodër ( mysliman, katolik dhe ortodoks). Në takimin e organizuar nga klerikët pasditen e së mërkurës në kinema "Millenium" të qytetit verior morën pjesë edhe përfaqësues të policisë, bashkisë dhe të prefekturës. Myftiu i Shkodrës, imam Muhamed Sytari tha se përmes këtyre elementëve negativë po shkatërrohet familja.
TAKIMI I KOMINUTETEVE FETARE
"Realitet e sotme shqiptare po na udhëzojnë gjithnjë e më tepër madhështinë e ajeteve që na distancojnë nga këto vese, alkooli, bixhozi, lojërat e fatit, fajdet dhe jo vetëm. Përhapja në masë e drogave, mbjellja, kultivimi dhe rritja e bimëve narkotike janë alarme të mjaftueshme, që duhet të na angazhojnë për të kontribuar përherë e më tepër për të mirë e atdheut dhe kombit tonë. Përhapja e kazinove, shtimi i fajdeve dhe bixhozit, korrupsioni në masë të frikshme, por jo vetëm, po shkatërrojnë familje të tëra shqiptare që e kanë humbur udhëzimin. Të gjithë duhet të ndërgjegjësohen se jeta e ndërtuar mbi instinktet kafshërore si dhe devijimi i mendjes janë shkatërrimtare e racës njerëzore. Shtimi i rasteve të vetëvrasjes për shkak të falimentimit si pasojë e bixhozit dhe lojërave të fatit, i vrasjeve si pasojë e borxheve me fajde apo shkatërrimi i familjeve për shkak të përhapjes së imoralitetit janë alarme, për të cilat duhet të shqetësohen edhe institucione të ndryshme shtetërore. E kanë për detyrë mbrojtjen e tabanit kombëtar nga degjenerimi, korrupsioni, shthurja dhe imoraliteti", pohoi imami Muhamed Sytari. Ndërkaq, Arqipeshkvi i dioqezës Shkodër- Pult, monsinjor Angelo Massafra u shpreh se nganjëherë këta persona që merren me këto vese janë viktima të sistemit apo edhe situatave. "Pas këtyre problemeve ka persona me mish e kocka, viktima nganjëherë të sistemit dhe nganjëherë të situatave. Nuk duhet të humbim sysh personin njerëzor me gjithë ngarkesën e tij të pozitivitetit dhe të vuajtjes". Gjatë fjalës së tij, famulltari i kishës ortodokse në Shkodër, At Nikolla Petani deklaroi se një viktimë për drogën që vazhdon të trafikohet apo kultivohet në Shqipëri është edhe vetë shteti. "Sot ( dy ditë më parë) jemi të gjithë së bashku për t'u thënë ndal këtyre fenomeneve, sepse secili në familjen e tij mundet që të bëjë diçka. E di që kohërat kanë ndryshuar, por familja jonë duhet që të qëndrojë në baza të shëndosha. Kur dëgjon çdo ditë në media për disa tonë me hashash që kapen në Europë, trafikuar nga shqiptarët ose kur thonë se hashashi është i një cilësie të lartë, konkurruese në vendet europiane besoj që kushdo që e ndjen veten shqiptar të ndërgjegjshëm nuk ndjehet aspak mirë, madje hidhërim dhe ankth të kap kur mendon për të nesërmen e Shqipërisë. Nëse ky fenomen nuk parandalohet në kohë, atëherë është një fenomen i rrezikshëm për shoqërinë dhe familjen tonë. Ka edhe një kategori njerëzish që e shohin me indiferentizëm dhe heshtin dhe ta dini që edhe ne jemi fajtorë të kësaj çështjeje. Ka edhe disa të tjerë që e shohin si tregti fitimprurëse për një kohë të shpejtë, si ekonomi për veten, ose për vendin duke lobuar edhe për legalizimin dhe përdorimin e hashashit si bimë mjekësore e rregulluar nga vetë shteti, por pavarësisht kësaj, kanabizimi i vendit është një fatkeqësi, një mallkim, një mëkat dhe me shumë viktima. Një viktimë është edhe vetë shteti shqiptar. Pavarësisht punës së bërë, përsëri nuk po parandalohet". Ai që tërhoqi vëmendjen në takimin e së mërkurës ishte famulltari i Velipojës, dom Marjan Gega, i cili tha se njerëz të botës së krimit janë ata që merren me trafikimin e drogës dhe këta persona janë me pushtet dhe po humbin shpresat e sigurta të pjesë dërrmuese të njerëzve. "Njerëzit e botës së krimit, të cilët duan të përfitojnë mbi dobësitë e të tjerëve janë të shumtë dhe shpeshherë janë njerëz me pushtet dhe me ndikim të madh në shoqëri, të cilët jetojnë në kurrizin e të tjerëve, shpeshherë nuk e përdorin ata vetë drogën, por jetojnë me moton: ' vdekja jote është jetë për mua, një shans që unë të jetoj'. Shihni se çfarë po ndodh në Shqipëri vitet e fundit me kultivimin e drogës, trafikimin në forma nga më të ndryshmet me importimin dhe eksportimin e drogave që me siguri nuk e bëjnë njerëzit e Në Shkodër aktualisht numri i përdoruesve të lëndëve narkotike është në rritje, ashtu siç edhe i trafikantëve. Ndërsa, ka më shumë persona të alkoolizuar, të cilët më pas kthehen në dhunues dhe abuzues në familjet e tyre. Po ashtu, një fenomen tjetër i përhapur në masë janë fajdet që jepen për qytetarët nga persona të lidhur me botën e krimit dhe pushtetin. thjeshtë, njerëzit pa ndonjë identitet. Ka edhe një problem të jashtëzakonshëm socio- ekonomik, që është deformimi i tregut. Nëse kemi përdoruesit dhe duam të dimë pse i përdorin, nga ana tjetër kemi trafikuesit dhe një imapkt të paevitueshëm që është deformimi i tregut nga paratë e pista. Këtu ata njerëz, të cilët janë duke i përdorur paratë e pista po ngjisin shkallët e distancave të pambërritshme të një pakice dhe po humbasin shpresat e sigurta shumica dërrmuese e njerëzve. Nuk ka barazi njerëzore, sepse ata që kanë paratë e pista mund të investojnë më shpejt dhe biles edhe të deformojnë tregun".