100 euro për të kaluar drejt zonës Shengen, pranga dy punonjësve të Policisë Kufitare
SHKODËR - Shërbimi për Çështjet e Brendshme dhe Ankesat në bashkëpunim me Prokurorinë e Shkodrës kanë goditur një tjetër rast të shpërdorimit të detyrës. Mësohet se SHÇBA kishte regjistruar procedimin penal mbi bazën e informacioneve që kishte siguruar më herët, për dyshime se rezultonin të implikuar edhe punonjës të policisë. Pas një hetimi me metoda speciale, u bë e mundur të dokumentohej ky aktivitet, ndërsa u ndaluan dy efektivë të Policisë Kufitare. Bëhet fjalë për Luan Xhekën, me detyrë ndihmëskontollor në Pikën e Kalimit Kufitar të Muriqanit dhe Bardhok Preçin, me detyrë përgjegjës turni në Stacionin e Policisë Kufitare në Shëngjin. Burime zyrtare nga policia dje bënë me dije se ata akuzohen për veprën penale të "Shpërdorimit të detyrës", ndërsa gjykata ka vendosur ndaj tyre masën e sigurisë "Arrest në burg". Hetimet kanë dokumentuar se kundrejt pagesave që shkonin deri në 100 euro, këta punonjës policie duke shpërdoruar detyrën, lejonin kalimin në pikat kufitare të shtetasve shqiptarë që u ishte ndaluar udhëtimi në zonën Shengen, si dhe regjistronin e vulosnin fiktivisht pasaportat e shtetasve të ndryshëm për të evituar shkeljen e afatit të qëndrimit në zonën Shengen. Materialet ndaj dy efektivëve të policisë i janë përcjellë për hetime të mëtejshme prokurorisë. Nga ana tjetër, SHÇBA fton qytetarët dhe mediat të denoncojnë çdo rast paligjshmërie të konstatuar apo korrupsioni, ku janë të implikuar punonjës të policisë, në numrin falas 0800 90 90 ose të shkruajnë në adresën ankesa @ shcba. gov. al.