272 ankesa nga qytetarët, Gjonaj: Ikin 46 punonjës nga hipotekat e ALUIZNI
Ministrja e Drejtësisë: Po analizojmë kushtet e veprës penale Paralajmërime për 15 persona dhe vërejtje për 29 të tjerë
6 largime nga detyra dhe 45 masa disiplinore për zyrtarët ZRPP dhe ALUIZNI janë masat ndëshkimore të marra nga Ministria e Drejtësisë, pas denoncimeve të qytetarëve në Platformën e Bashkëqeverisjes. Ministrja e Drejtësisë, Etilda Gjonaj prezantoi dje këto masa në një konferencë për mediat. "Që prej muajit nëntor 2017 e deri në fund të muajit mars 2018, përgjatë një periudhe 5- mujore, 272 ankesa të ardhura në Platformën e Bashkëqeverisjes, në adresë të Hipotekës ose ALUIZNI- t janë zgjidhur me rezultate konkrete për qytetarët, duke i pajisur ata me dokumentin e kërkuar të pronësisë. Ankesat e qytetarëve janë zgjidhur brenda afatit 10- ditor të përcaktuar në platformë, ndërkohë që rezultonte se qytetarët ishin sorollatur me vite të tëra. Janë zgjidhur pikërisht sepse qytetarët nuk kanë ndenjur duarkryq, duke pritur apo duke u ankuar lart e poshtë, në kërkim të mikut apo sekserit të radhës", u shpreh dje Gjonaj. "Ata qytetarë që kanë vepruar pa ngurrim përmes platformës kanë vënë në provë jo vetëm mekanizmin e bashkëqeverisjes sonë me njerëzit, por edhe mënyrën e funksionimit të zyrave shtetërore, të cilat kanë nisur të ndryshojnë. Por, jemi të vetëdijshëm që ka ende brenda tyre punonjës që duhet t'i identifikojmë e largojmë së bashku", u shpreh ministrja e Drejtësisë.
Sipas saj, këto ankesa kanë ndihmuar në pastrimin e zyrave nga këta punonjës. "Për çdo ankesë dhe çdo praktikë të qytetarëve që është zgjidhur, është kryer një analizë e detajuar, e cila ka identifikuar personat përgjegjës për moszgjidhjen e tyre në kohë. Si rezultat i kësaj analize, 35 shkarkimeve të lajmëruara më parë, u shtohen sot edhe 46 shkarkime të tjera të punonjësve të Hipotekës më së shumti dhe ALUIZNI- t. Po ashtu, është urdhëruar paralajmërimi për shkarkim nga detyra për 15 punonjës të tjerë, të cilët në rast përsëritjeje do të shkarkohen dhe ndiqen edhe
penalisht sipas rastit", njoftoi ministrja Gjonaj. Sipas saj, për 29 punonjës të tjerë të administratës është marrë masa administrative "Vërejtje me shkrim". Në këtë periudhë po analizohen edhe kushtet e veprës penale për të gjithë të shkarkuarit nga Zyrat e Regjistrimit të Pasurive të Paluajtshme dhe ALUIZNIt. "Kushdo që pengon ose
bllokon për qëllime korruptive, apo edhe thjesht vonon për neglizhencë qytetarët, në marrjen në afat të shërbimit që u takon sipas ligjit, është problemi ynë i përbashkët! Prandaj unë përsëris thirrjen për çdo qytetar që ndeshet me pengesa, bllokime apo vonesa të paligjshme në marrjen e dokumenteve nga Zyrat e Regjistrimit të Pasurive të
Paluajtshme apo ALUIZNI, por edhe në tërësi në çdo zyrë shtetërore të na drejtohet pa ngurrim përmes platformës së bashkëqeverisjes ' Shqiperiaqeduam. al.'", u shpreh më tej ministrja e Drejtësisë. "Ne jemi shumë të vendosur për të mos toleruar asnjë rast abuzimi me detyrën dhe duam ndihmën e çdokujt që e has abuzimin me detyrën shtetërore në rrugën e vet. Qytetarët janë aleati ynë i madh dhe i vetëm në këtë mandat të ri për Shqipërinë që duam!", theksoi Gjonaj. E pyetur nëse nga këto denoncime të qytetarëve ka punonjës që janë çuar për ndjekje penale, ministrja tha se "në të gjitha rastet, bazuar në analizën shumë të detajuar që iu është bërë ankesave që kanë ardhur në Platformën e Bashkëqeverisjes janë identifikuar jo vetëm problemet dhe shkeljet administrative që punonjësit e administratës kanë kryer, por njëkohësisht edhe elementet që mund të përbëjnë vepër penale. Jemi akoma në fazën e shqyrtimit të faktit, nëse përbën një vepër penale dhe menjëherë ato do të depozitohen si kallëzime në organin e akuzës".