Rama, deputetëve të PS: Dilni në terren, jeni kthyer në agallarë
Kryeministri u kërkon ligjvënësve të mos provokohen nga opozita
Kryetari
i PS- së, Edi Rama iu kërkoi dje deputetëve në grupin parlamentar që të zbresin në terren dhe të merren me njerëzit. Në mbledhjen e djeshme, kryeministri është shprehur i pakënaqur me deputetët, por pa përmendur emra në veçanti. "Disa prej jush kanë shkuar drejt apatizmit, janë kthyer në agallarë. Duhet të shkoni në zonë, të zgjidhni hallet e njerëzve", mësohet të jetë shprehur kryeministri. Rama ka kërkuar që të punohet më shumë me bazën, sikur zgjedhjet të ishin këtë qershor. "Të punohet më shumë me bazën. Të shpërndaheni nëpër zonat tuaja. Drejtuesit e degëve në rrethe të jenë të përkushtuar. Angazhimi në terren duhet të jetë maksimal. Të punojmë sikur zgjedhjet të jenë këtë qershor", mësohet të ketë thënë kryeministri e njëherësh kryetari Rama. Në mbledhje ka pasur një ndërhyrje nga deputeti i Fierit, Ismet Beqiri, i cili ka pasur ankesa për drejtorët, të cilët sipas tij, po sillen sikur të jenë ministra. Deputeti ka kërkuar më shumë vëmendje për punësimet, por kryeministri Rama mësohet t'i ketë thënë se "administrata është ajo që është e ndaj po punohet për ta përmirësuar, por edhe ndërhyrjet duhet të kenë një logjikë dhe një kufi". Ndërkohë, në mbledhje Rama ka kërkuar nga deputetët e ministrat që të mos provokohen nga deputetët e opozitës, nisur nga ngjarja e fundit që ndodhi me ministrin Bushati, i cili u hodhi ujë deputetëve të opozitës në seancë. Rama mësohet t'u ketë kërkuar deputetëve të tij të ruajnë qetësinë. "Nuk duhet t'u kundërpërgjigjemi provokimeve të opozitës", mësohet të ketë thënë Rama.