' Lironi vëllezërit tanë', qytetarët e Kukësit në protestë për 11 të arrestuarit
Siç e kishin lajmëruar më herë, qytetarët e Kukësit u ngritën dje, në protestë, për të kërkuar lirimin e 11 të arrestuarve pas tubimit të dhunshëm në 31 mars që u mbajt në Rrugën e Kombit në shenjë kundërshtie për taksën. Kanë qenë anëtarët e Këshillit Bashkiak të Kukësit ata që kanë organizuar protestën e sotme, që u mbajt në sheshin para gjykatës së këtij qyteti. "Lironi vëllezërit tanë" është një nga thirrjet e protestuesve drejtuar autoriteteve, ku tubimit i janë bashkuar banorë të Kukësit, Hasit dhe Tropojës. 11 të arrestuarit vijojnë të qëndrojnë në paraburgim, në pritje të vendimit të Gjykatës së Apelit në Shkodër. Ndërkohë, PD vendosi që të marrë pjesë në seancën e sotme gjyqësore për 11 protestuesit. Kujtojmë se edhe herën e parë, kur u dha masa e sigurisë në gjykatën e Tiranës, deputetë të opozitës ishin në sallën e gjyqit, ndërkohë që seanca u shoqërua me disa incidente. Protestuesit kërkuan edhe heqjen e taksës së kalimit në Rrugën e Kombit. Xhevahir Gashi, babai i njërit prej të arrestuarve, duke kërkuar lirimin e të birit tha: "Me gra me fëmijë, i madh dhe i vogël, në orët e vona të mesnatës i nxjerrin me forcë jashtë. Kujtova se është Serbia dhe hyri brenda, por ishte policia shqiptare. Kërkesa ime është zero taksa, e dyta të lirohen djemtë nga qelia se janë të pafajshëm". Protesta u mbyll brenda afatit të përcaktuar, ndërsa policia e Kukësit kishte menduar ta mbante vetë situatën nën kontroll, duke mos thirrur në ndihmë Forcat e Ndërhyrjes së Shpejtë.