Ministri grek: Pakti me Shqipërinë, në fund të majit, s'kemi folur për çamët
Kotzias: Formalisht jemi në luftë, pronat në duart e shtetit grek
Ministri
i Jashtëm grek, Nikos Kotzias u shpreh dje optimist se negociatat me Shqipërinë do të jenë finalizuar deri në fund të muajit të ardhshëm. "Kur të diskutohet në parlament, do të befasoheni", ka paralajmëruar Kotzias gjatë një interviste radiofonike. I pyetur nga gazetarët nëse negociatat janë pezulluar, Kotzias ka thënë se "ndodhemi në një çështje të fundit", ndoshta duke nënkuptuar pjesën e negociatave që lidhet me "Paktin Detar". "Këtë po e shqyrtojmë", ka vazhduar ministri i Jashtëm grek dhe ka shtuar: "Do të kemi mbledhje javët e ardhshme, ashtu siç parashikon Kushtetuta e vendit mik dhe komunikimi që bëri Presidenti Meta me qeverinë e atjeshme. Kanë një procedurë të brendshme të vështirë. Besoj se deri në fund të majit do të jenë mbyllur esencialisht dhe formalisht edhe çështjet e fundit të hapura. E dini, janë probleme që ekzistojnë që prej 70- 80 vjetësh. Kur të vijë për diskutim në parlament, do të befasoheni me ato që do të dëgjoni dhe me budallallëqet që bëhen nga të dyja palët". Kotzias ka mohuar edhe një herë se pala shqiptare ka shtruar në negociata çështjen çame. "Askush në këto negociata nuk ka shtruar çështjen çame, nuk kemi pranuar që të shtrohet një çështje e tillë në negociata. Për pasuritë, të vetmet pasuri që ekzistojnë janë ato që kanë të bëjnë me ligjin e luftës. Formalisht, në një sens, jemi akoma në luftë me Shqipërinë. Përderisa nuk bëhet me mjaftueshmëri juridike abrogimi i ligjit të luftës, këto pasuri mbeten të konservuara në duart e shtetit grek. Që nga shpallja e luftës kundër Greqisë, nga Italia dhe Shqipëria që atëherë ishin bashkuar në një mbretëri. Këto janë që nga lufta, nuk kanë të bëjnë me çamët. Për çamët janë vendimet gjyqësore dhe të parevokueshme", ka përfunduar ministri i Jashtëm grek.