Dosja "Treblova", dënohen me 29 vite burg trafikantët
2.4 tonë kanabis, grupi i strukturuar kriminal nën akuzë për kultivim të lëndës narkotike Të pandehurit përfituan uljen nga gjykimi i shkurtuar
Gjykata për Krimet e Rënda përfundoi ditën e djeshme procesin gjyqësor ndaj katër të pandehurve të dosjes "Treblova". Trupa gjykuese dha vendimin për grupin kriminal të cilët u prangosën në korrik të vitit 2016 ku iu sekuestruan 2.4 tonë kanabis. Togat e zeza i vlerësuan të bazuara pretendimet e prokurorisë për përfshirjen e tyre në kultivimin e bimëve të drogës që trafikohej në Itali nga grupi i "Habilajve". Katër të pandehurit u dënuan me 29 vite burg në total. Konkretisht për Taulant Haxhiraj, gjykata dha 9 vite burg. Shkëlqim Koçiaj dhe Marjus Bajrami u dënuan me nga 8 vite, ndërsa Xhovalin Baco me 4 vjet heqje lirie. Për shkak të gjykimit të shkurtuar, të pandehurit përfituan uljen e një të tretës së këtyre dënimeve. Personat e sipërpërmendur akuzohen për "Kultivim të lëndë narkotike në bashkëpunim, në formën e grupit te strukturuar kriminal" dhe "Kryerje të veprave penale nga organizata kriminale, grupi i strukturuar kriminal".
Nga hetimet e prokurorisë ka rezultuar se në krye të grupit të strukturuar kriminal qëndronte shtetasi Taulant Haxhiraj, i cili bashkëpunonte ngushtë me punonjësin e policisë, Renaldo Avdulaj, si edhe me disa persona të tjerë. Këta kishin për detyrë marrjen e
REPUBLIKA E SHQIPËRISË KONTROLLI I LARTË I SHTETIT
masave konkrete për kultivimin, magazinimin dhe më tej, shpërndarjen e lëndës narkotike. Oficeri Avduli shfaqet në përgjime me kreun e grupit të trafikantëve, kur ky i fundit nga frika se mund të ishte policia, e pyet për të shtënat, të cilat konfirmohen prej oficerit se janë të trafikantëve në parcelat afër. Të shtënat e armëve përshkruhen si zhurmë lufte. Ky grup u prangos në korrik të vitit 2016 ndërsa asokohe pati dhe një përplasje mes prokurorisë dhe policisë në lidhje me sasinë e sekuestruar të drogës. Gjatë arrestimit të të pandehurve një vit më parë, u sekuestruan plot 7250 rrënjë kanabis në fshatrat Vezhdanisht- Treblovë. Ndërkohë në këtë grup janë ende në kërkim dhe dy shtetas mes tyre Gjovalin Baco dhe Reshat Radhima.