"Mother Jones", Luan Rama: Sajesë, kemi deklaruar në KQZ dhe në bankë
LSI reagon pas artikullit të revistës amerikane: Jemi transparentë "Kryeministri nuk ka krijuar Komitetin Kombëtar të antidrogës"
Zv. kryetari i LSI- së, Luan Rama deklaroi dje në një bashkëbisedim me gazetarët se artikulli i revistës "Mother Jones" është "një sajesë". Sipas deputetit të LSI- së, "' Mother Jones' është një çështje të cilën e quaj jo vetëm të ezauruar, por edhe të tepruar të vazhdojmë të merremi me të. Transparenca dhe të gjitha veprimet tona janë kryer konform ligjit. Janë deklaruar në KQZ, janë kryer me bankë, i keni dhe po t'i klikoni në uebsitin e KQZ të gjitha deklarimet, tona prandaj çdo tymnajë që përpiqet ta zhvendosë vëmendjen nga halli i madh i qeverisë dhe i kryeministrit me krimin dhe me korrupsionin, me drogën, me papërgjegjshmërinë përballë qytetarëve, me taksat dhe tarifat". Ai tha se LSI bëri një reagim korrekt, shumë etik e profesional ndaj artikullit të "Mother Jones", si shenjë përgjegjshmërie politike ndaj qytetarëve të vendit. Një ditë më parë, kjo revistë publikoi një artikull, ku flitej për lobimin e LSI- së përmes një kompanie në Qipro, që kishte lidhje me oligarkë rus për të siguruar takime të ishkreut të saj, me Donald Trump. Deputeti i LSI- së, Luan Rama akuzoi kryeministrin se nuk ka ngritur Komitetin Kombëtar të bashkërendimit të luftës kundër drogës. "Në mënyrë paradoksale dhe në papërgjegjshmëri të plotë nuk është krijuar, nuk funksionon, nuk ekziston institucioni më i rëndësishëm që duhej të ngrihej në vend për luftën ndaj trafikut të drogës. Kjo nuk është një çështje fantazie dhe as shijesh individuale apo personale, por është detyrim ligjor", tha Luan Rama. Ky komitet drejtohet nga kryeministri. "Në përbërje të këtij komiteti, të cilin do të duhej ta drejtonte kryeministri, pra është një përgjegjësi ligjore e drejtpërdrejtë, taksative e kryeministrit, edhe për shkak të faktit që është kryeministër, pra në përbërje të këtij komiteti janë pothuaj të gjitha ministritë", sqaroi Rama. Duke vijuar më tej analizën e ligjit për krijimin e këtij komiteti, Luan Rama tha se, "në nenin 5 të të njëjtit ligj, që gjithashtu është një shkelje flagrante, është një papërgjegjshmëri totale dhe këtu hyn në lojë dhe Kuvendi i Republikës së Shqipërisë, i cili ka mbyllur sytë në rastin më të mirë, në rastin më të keq është po aq përgjegjës dhe bashkëfajtor me kryeministrin, sepse në bazë të nenit 5 të ligjit, Komiteti Kombëtar i Bashkërendimit të Luftës Kundër Drogës, nëpërmjet kryeministrit, brenda datës 30 mars të çdo viti, i paraqet Kuvendit një relacion me të dhënat që kanë të bëjnë me paraqitjen e dukurisë së drogës në Shqipëri, me strategjitë e përshtatura, me objektivat e arritura dhe orientimet e ardhshme të qeverisë për detyrimet ndërkombëtare. Jemi në një moment deçiviz dhe në moment të rëndësishëm natyrisht, pas rekomandimit të bërë nga Komisioni Europian për çeljen e negociatave të Bashkimit Europian me Shqipërinë në procesin e integrimit dhe ne bëjmë shumë mirë që jo vetëm e mbështesim. Bëjmë shumë mirë që e presim me entuziazëm çeljen e negociatave, që në thelb do të thotë çelje e një kapitulli apo e një etape tjetër shumë të rëndësishme dhe shumë të vështirë të plotësimit të detyrimeve që ka Shqipëria në proces të integrimit europian. Por me çfarë serioziteti e kërkojmë këtë gjë, kur nuk zbatojmë ligjin?", u shpreh Luan Rama. "Lidhur me deklaratat e kolegut të ' Mother Jones', Dan Friedman në intervistën e tij për ' Zërin e Amerikës', dëshirojmë të themi se herën tjetër kur kolegu Friedman dhe ' Mother Jones' të kenë pyetje, të dërgojnë gjithashtu dhe përgjigjet që ata duan, në mënyrë që ne vetëm t'i konfirmojmë", reagoi LSI, pas intervistës së gazetarit amerikan.