Paloka: Pa Saimir Tahirin para drejtësisë, BE derë e mbyllur

Demokratike reagoi dje përmes nënkryetarit të saj, Edi Paloka, sa u përket atyre që i janë thënë kryeministrit Rama në Berlin për arrestimin e Saimir Thairit. "E vërteta e vizitës së Ramës në Berlin është se pa Saimir Tahirin para drejtësisë, Bashkimi Europian do të jetë një derë e mbyllur për Shqipërinë", deklaroi dje në mbrëmje Paloka. "Nuk prisnim sot që Edi Rama t'u thoshte të vërtetën shqiptarëve për vizitën e tij në Berlin. E vërteta është se pa Saimir Tahirin para drejtësisë, Bashkimi Europian do të jetë një derë e mbyllur për Shqipërinë", u shpreh nënkryetari i PD- së. "Me keqardhje duhet të pohojmë se nuk ka vend për optimizëm, për sa kohë Edi Rama nuk ka përmbushur detyrat: të luftojë krimin e organizuar dhe korrupsionin, të shkëpusë lidhjet e politikës me krimin, të lejojë drejtësinë të veprojë me Saimir Tahirin. Këto janë parakushtet që Berlini pret të plotësohen që të hapë dritën jeshile për negociatat e Shqipërisë", tha më tej deputeti demokrat. Sipas Palokës, "pengesa për Shqipërinë nuk është opozita, nuk janë miqtë e Shqipërisë në Berlin që kërkojnë standard gjerman për Saimir Tahirin dhe luftën kundër krimit të organizuar. Opozita ka dhënë mbështetje të pakushtëzuar dhe ka lobuar në Berlin e kudo që Shqipërisë t'i hapën negociatat si mjeti më efikas për të shtuar presionin dhe monitorimin ndaj një qeverie, që nuk zbaton asnjë standard europian. Shqiptarët meritojnë ta dinë të vërtetën: pengesa e vetme për Shqipërinë Europiane është Edi Rama, lidhjet e tij me krimin dhe mbrojtja politike për Saimir Tahirin", tha në fund Paloka.