Protestë në Këshillin Bashkiak të Vlorës, ndërpritet mbledhja
Qytetarët e Orikumit: Duam drita e ujë të pijshëm 24 orë pa ndërprerje Banorët e lagjes "Kushtrimi": Duam dëmshpërblim për shtëpitë që i ndërtuam me gjak dhe na i shembën
Banorët e Orikumit dhe ata të lagjes "Kushtrimi" në qytetin e Vlorës dje e zhvendosën protestën e tyre në Këshillin Bashkiak të Vlorës. Pasi nuk kanë marrë zgjidhje për një sërë problemesh që i shqetësojnë, ata kanë hyrë në sallën ku bëhej mbledhja me pankarta në duar. Përballja e protestuesve me anëtarët e këtij këshilli ka shkaktuar tension, madje mbledhja është ndërprerë. Mësohet se banorët e lagjes "Kushtrimi" kanë kërkuar dëmshpërblim për banesat e tyre, që u shembën në kuadër të ndërtimit të segmentit lidhës të autostradës me rrugën Transballkanike. Bëhet fjalë për 28 familje, të cilat nuk kanë përfituar dëmshpërblim. Ndërkohë që prej katër muajsh nuk përfitojnë as qiranë e banesave ku janë vendosur, në pritje të dëmshpërblimit. "Jemi lodhur nga gënjeshtrat e shtetit që na thotë se do u bëj pallat. Ka 4 vjet që nga janari e deri në prill që na thuhet e njëjta gjë. Ka ardhur komisioni dhe tha do u japim 70 për qind dhe blini vetë shtëpitë. Atë të realizojnë. Ne do të ishim akoma në shtëpi, por dëgjuam shtetin e dolëm nga banesat tona. Ndërsa shteti na gënjeu", u shpreh njëri prej banorëve të lagjes "Kushtrimi". "Shtëpitë i kemi ndërtuar me gjak. Pse të mos na paguhet vlera e shtëpisë?! Dhe tani jemi pa punë. Jam 7 veta në familje dhe nuk kam asnjë të ardhur", tha një grua. Me protestën janë solidarizuar dhe këshilltarët e djathtë, të cilët kanë bojkotuar mbledhjen me pretendimin se nuk është futur në rend dite të mbledhjes së këshillit të bashkisë kërkesa e banorëve të lagjes në fjalë. Më pas ishin banorët e Orikumit, të cilët ngritën si shqetësim mungesën e ujit të pijshëm dhe energjisë elektrike, në një zonë turistike dhe që i paguan më shumë taksa bashkisë. Ata u kërkuan llogari anëtarëve të këshillit bashkiak se ku
shkojnë paratë e taksave që ata paguajnë, ndërsa nuk marrin asnjë shërbim. Gjithashtu, banorët e Orikumit deklaruan se mosfurnizimi i rregullt me ujë të pijshëm
dhe energji elektrike përgjatë 24 orëve do të çojë në dështimin e sezonit turistik. Banorët e Orikumit dhe lagjes "Kushtrimi" kërkuan prezencën e kryetarit të
Bashkisë së Vlorës, Dritan Leli, i cili nuk ishte i pranishëm në sallë. "Dritan Leli dhe Edi Rama na gënjyen", shkruhej në pankartat që mbanin protestuesit në sallë.
Për shkak të debateve të ashpra dhe tensionit të krijuar, në sallën e mbledhjes kanë mbërritur edhe punonjës të Policisë Bashkiake për të qetësuar situatën.