Akuzohen për pastrim parash, prokuroria çon për gjykim dosjen e vëllezërve Hasanbelli
Geron e Erion Hasanbelli akuzohen për vrasje në Belgjikë pas masakrës së Sanatoriumit Nën akuzë, edhe motra. Gjykata u sekuestroi pasurinë, dyshohet se është siguruar në rrugë të paligjshme
Prokuroria e Fierit ka përfunduar hetimet dhe ka çuar për gjykim dosjen në ngarkim të shtetasve Gentjan ( Geron) Hasanbelli, Erion ( Mikel) Hasanbelli dhe Hysnie Hasanbelli. Sipas burimeve zyrtare nga organi i akuzës, dy vëllezërit dhe motra e tyre akuzohen për veprën penale "Pastrim i produkteve të veprës penale ose veprimtarisë kriminale". Pasuritë e tyre ishin vendosur në sekuestro preventive nga Gjykata e Shkallës së Parë e Fierit me kërkesë të prokurorisë së këtij rrethi, pasi dyshohet se janë siguruar në mënyrë të paligjshme. Dy vëllezërit Hasanbelliu nga Patosi, vite më parë ishin shpallur në kërkim ndërkombëtar nga autoritetet italiane si pjesë e një organizate kriminale, që shfrytëzonin për qëllime prostitucioni në Milano vajza nga Shqipëria, Rumania, Bullgaria, Rusia, Maroku, Moldavia etj., si edhe për trafik lëndësh narkotike nga Shqipëria në drejtim të Italisë.
Policia e Elbasanit ekzekutoi më 25 korrik të 2015- ës një urdhër ndalimi ndaj vëllezërve, me akuzën e trafikut të drogës dhe prostitucionit. "Këta shtetas u ndaluan nga efektivët e policisë, pasi Gjykata e Milanos në Itali ka lëshuar urdhër arresti për veprat penale ' Trafik droge', ' Organizatë kriminale, ndihmë dhe nxitje prostitucioni'", thuhej në njoftimin zyrtar të asaj kohe.
MASAKRA E SANATORIUMIT
Më 19 gusht të vitit 2000, Kasandër Noga hyri në Sanatorium i shoqëruar nga Julian Çela dhe pasi shkelmuan dhomën e reanimacionit ku ndodheshin të shtruar Aqif Hasanbelli ( babai i vëllezërve Hasanbelli) dhe Dritan Hajdini, shoku i Geronit, u ka hequr serumin nga krahu dhe me breshëri automatiku i ka lënë të vdekur në vend. Vrasja ndodhi për motive hakmarrjeje, pasi këta persona i kishin vrarë kohë më parë vëllain Kasandër Nogës.
HAKMARRJA NË BELGJIKË
Vëllezërit Hasanbelli u vunë në ndjekje të djaloshit nga Patosi dhe dy vjet më vonë, më 17 mars të vitit 2002, Geroni së bashku me Erion Hasanbelliun tentojnë të hakmerren. Në Antverp të Belgjikës, Erion dhe Geron Hasabelliu ekzekutojnë Julian Celën dhe plagosin rëndë Kasandër Nogën. Pas ngjarjes në Belgjikë, Geroni arriti të arratisej dhe u strehua në Itali, ku u arrestua në vitin 2009 dhe u ekstradua në Shqipëri. Kurse Kasandër Noga, autori i masakrës së Sanatoriumit u arrestua nga policia belge në vitin 2003 dhe në 2005 u ekstradua në Shqipëri, pasi mbi të rëndonte një dënim me burgim të përjetshëm. Ndërkohë, autoritetet belge sollën dosjen e vrasjes në Anvers në Shqipëri. Në shtator të vitit 2008, Gjykata e Fierit vendosi në mungesë masën e sigurisë "Arrest me burg" për Geronin dhe vëllain e tij. Ai u shpall në kërkim dhe u ekstradua nga Italia më 17 qershor të vitit 2009. Gjykata e Shkallës së Parë të Fierit me vendimin e datës 7 shtator 2009 e shpalli të pafajshëm Geron Hasanbelli dhe urdhëroi lirimin e menjëhershëm, duke dënuar vetëm të vëllanë, Erionin me 25 vjet heqje lirie për kryerjen e veprave penale "Vrasje me paramendim për gjakmarrje e kryer në bashkëpunim", "Vrasje me paramendim për gjakmarrje" e kryer në bashkëpunim mbetur në tentativë si dhe "Mbajtje pa leje të armëve të zjarrit". Çështja shkoi në Gjykatën e Apelit
të Vlorës, e cila rrëzoi këtë vendim dhe e dënoi Geronin me 14 vite burg. Në zbatim të këtij vendimi, policia e Tiranës arrestoi mbrëmjen e 13 qershorit 2013 Geron Hasan-
belli në Rrugën e Barrikadave. Ndërkohë që më 21 tetor 2013 nga Belgjika u ekstradua vëllai i tij, Erion ( Mikel) Hasanbelli, atëherë 35 vjeç, nga Fieri.