Trafikonin drogë me avion nga Shqipëria drejt Italisë, bien në pranga 7 shqiptarë
Policia
italiane ka vënë në pranga mëngjesin e djeshëm 7 shqiptarë, pasi akuzohen për trafik droge nga Shqipëria drejt vendit fqinj. Arrestimi i tyre u bë në kuadër të hetimeve të nisura në 2015- ën për një bandë italo- shqiptare, që trafikonte kanabis me avionë të vegjël drejt Italisë. Sipas agjencisë italiane të lajmeve "Ansa", operacioni i autoriteteve policore të Riçione, në Rimini të Italisë, nën drejtimin e prokurorisë së Bolonjës, çoi në shkatërrimin e një grupi kriminal shqiptar, aktiv në rivierën romanjole, i specializuar në trafikun ndërkombëtar të drogës. Për arrestimet në Itali ka reaguar edhe policia shqiptare, duke sqaruar se bëhet fjalë për operacionin "Free- Flight" të vitit 2015, ndërsa tani po zbatohen fletëarrestet. Sipas policisë shqiptare, sot homologët italianë kanë zbatuar fletë- arrestet pas apelimit që kishin bërë 7 prej personave të akuzuar në 2015. "Lidhur me lajmin për operacionin antidrogë në Itali, rezulton se është procedim i disa viteve më parë dhe po zbatohen fletë- arrestet e Prokurorit të DDA së Bolonjës pas apelimit që kishin bërë 7 prej personave të akuzuar në 2015. Operacioni është i vitit 2015, i koduar ' Free- Flight', i zhvilluar në bashkëpunim me policinë shqiptare", njoftoi policia shqiptare. Ndërkohë, gjatë operacionit "Free Flight" të zhvilluar në 26 gusht të 2015- ës, të paktën 9 persona përfunduan në prangat e autoriteteve italiane, një operacion i zhvilluar në bashkëpunim me autoritete shqiptare. Në mesin e të arrestuarve ishte edhe Vilson Lamaj, personi që drejtonte avionin e vogël dhe konsiderohej si "koka" e kësaj bande. Ai u arrestua në një pistë në Bolonja, ndërsa ishte nisur nga Vlora. Në avion atij iu gjetën 130 kilogramë marijuanë. Në atë kohë policia italiane sekuestroi mbi 3.5 kuintalë marijuanë dhe një sasi kokaine.