Tahiri depoziton kërkesën e dorëheqjes, letra për Ruçin

Saimir

Tahiri dorëzoi dje zyrtarisht në Kuvend kërkesën për dorëzimin e mandatit. Në letrën drejtuar kryeparlamentarit, Tahiri vetëm përmes një fjalie ka kërkuar të ndiqet procedura për lënien vullnetarisht të mandatit. "I nderuar z. Ruçi. Për arsyet që tashmë i kam bërë publike, kërkoj prej jush të ndiqni procedurat ligjore të parashikuara nga ligji për dorëzimin e mandatit tim si deputet i Kuvendit të Shqipërisë", thuhet në letër. Pasi KQZ të njoftohet nga Kuvendi për vakancën javën e ardhshme, pritet të nisë procedurat për zëvendësimin e mandatit të Tahirit. Edhe pse prej 6 muajsh ishte deputet i pavarur, mandati i Tahirit do t'i kalojë grupit parlamentar socialist nga listat e të cilit në Tiranë ish- ministri u zgjodh deputet në 25 qershor. Socialistët fituan 18 mandate në kryeqytet dhe i 19, të cilit i kalon edhe mandati i deputetit renditet ish- deputeti i LSI, aktualisht këshilltar për marrëdhëniet me parlamentin i kryeministrit, Spartak Braho. Shumica socialiste kishte refuzuar herën e parë që t'ia hiqte mandatin Tahirit, pas kërkesës së prokurorisë për arrestimin e tij. Prokuroria e Krimeve të Rënda bëri të ditur se zotëron dy letërporosi nga Italia dhe Greqia dhe pretendon se në bazë të tyre disponon prova të reja, që mund të dëshmojnë implikimin e Tahirit në trafikun e drogës bashkë me grupin e Habilajve. Një nga pistat e ndjekura nga prokuroria, është një hyrje- dalje e Tahirit nga Shqipëria që nuk është regjistruar në sistemin TIMS, ndërkohë që në shtetin e huaj ku ka qenë, hyrja dhe dalja e tij është regjistruar.