Kukan: Shqipëria të bindë skeptikët, kujdes me Gjermaninë, Francën e Holandën!
Eurodeputeti
Eduard Kukan i rekomandon Shqipërisë që veç lobingut me Gjermaninë për mbështetje sa u përket negociatave, duhet të merret edhe me Holandën dhe Francën. "Progresi në Shqipëri dhe Maqedoni ishte i dukshëm dhe mund të themi që Komisioni Europian vëzhgoi me shumë vëmendje situatën dhe rekomandimi i dhënë për të dyja vendet ishte pasqyra më e mirë, më objektive dhe më e ndershme ndaj situatës në Shqipëri dhe Maqedoni. Pika tjetër është që autoriteti që merr vendimin është Këshilli Europian, që përbëhet nga shtetet anëtare të Bashkimit Europian. Sipas përvojës, në përgjithësi, shtetet anëtare kur marrin vendime të tilla shohin së pari marrëdhëniet e tyre bilaterale me vendin në fjalë dhe jo nëse vendi ka përmbushur kriteret që janë përcaktuar në nivelin europian", u shpreh Kukan, citon "TV Klan". Sipas tij, "vendimi merret shpesh në bazë të marrëdhënieve bilaterale, që në këndvështrimin tim, është diçka e gabuar, por ky është vendimi i shteteve anëtare sovrane. Siç i kam thënë edhe në Shqipëri kryeministrit dhe ministrit të Jashtëm, ata duhen të fokusohen tek vizitat në këto vende dhe të përdorin argumentet e tyre më të mira politike, por edhe sharmin e tyre. Sharmi në politikë është gjithnjë i rëndësishëm. Kjo po ndodh. Kam ndjekur që kryeministri ka vizituar Berlinin dhe është takuar me kancelaren Angela Merkel. Ne nuk e njohim ende qëndrimin zyrtar të Gjermanisë, por dimë jozyrtarisht se janë në fazën e përgatitjes se cili do jetë vendimi i tyre për Shqipërinë. Pastaj është Franca dhe Holanda", tha Kukan.