“Luarasi” fillon korrigjimin automatik të provimeve
Elvin Meka: Synojmë rritjen e transparencës në vlerësimin e studentëve
Kolegji Universitar “Luarasi” ka filluar të zbatojë për herë të parë projektin “CleanScore”, i njohur ndryshe edhe si korrigjimi automatik i provimeve. Nëpërmjet kësaj risie të ofruar nga ky institucion elitar i arsimit të lartë, synohet që të rritet transparenca në vlerësimin e studentëve, si dhe të përmirësohet cilësia e mësimdhënies duke zëvendësuar librat aktual me versione cilësore të njohura ndërkombëtare. Aktualisht ky projekt dhe standard ka filluar të zbatohet në lëndën “Institucionet financiare dhe tregjet e kapitaleve”, që zhvillohet në programin e studimit master shkencor “Financë- Bankë” te “Luarasi”. Në një intervistë për “Gazeta Shqiptare” administratori i këtij universiteti, prof. asoc. dr. Elvin Meka tregon se zbatimi i projektit “CleanScore” synon vendosjen e një standardi të lartë cilësie dhe transparence, në drejtim të kontrollit të dijeve të studentëve. Ai më tej thekson se ky standard i ri do të luftojë fiktivitetin e notës dhe abuzimeve, e do të sjellë një vlerësim sipas meritokracisë të studentëve, studim sistematik dhe logjik, si dhe përdorim intensiv të literaturës së detyrueshme. Gjithashtu, Meka bën me dije se kjo risi po shihet shumë pozitivisht dhe me vlerë të shtuar nga studentët, pasi në thelb ky sistem korrigjimi vlerëson me drejtësi dhe paanshmëri gjithkënd. Administratori i “Luarasit” nënvizon se vetë studentët kanë shprehur dëshirën që pjesë e këtij projekti duhet të bëhen sa më shumë lëndë.
Çfarë “CleanScore”?
“CleanScore” është një projekt i mbështetur nga Fondi Shqiptaro- Amerikan për Zhvillim, AADF, për korrigjimin automatik ( të kompjuterizuar) të provimeve, që synon rritjen e transparencës në vlerësimin e studentëve, si dhe përmirësimin e cilësisë së mësimdhënies, duke zëvendësuar librat aktual me versione cilësore të njohura ndërkombëtare. Ky projekt kërkon të transformojë tërësisht raportin StudentPedagog- Universitet në favor të cilësisë, duke minimizuar dhe luftuar fenomenin e notës fiktive dhe të pamerituar.
Si është ndërtuar teza e këtij sistemi?
Meqenëse këto provime kërkojnë si parakusht përdorimin në lëndët respektive të librave të autorëve të mirënjohur ndërkombëtarisht, edhe formati i tezës ndjek modelin e përdorur në universitetet e huaja dhe mbështetur në bankën e pyetjeve, të ndërtuara nga vetë autorët e këtyre librave. Konkretisht, tezat përmbajnë pyetje me alternativa dhe ato logjike.
Cili është synimi i aplikimit të kësaj risie?
Zbatimi i projektit “CleanScore” synon që edhe në Kolegjin Universitar “Luarasi” të vendoset një standard i lartë cilësie dhe transparence, në drejtim të kontrollit të dijeve të studentëve, luftimin e fiktivitetit të notës dhe abuzivizmit, si nga pedagogët edhe nga studentët, vlerësimin sipas meritokracisë së studentëve, të studiuarit sistematik dhe logjik, si dhe përdorimit intensiv të literaturës së detyrueshme. Për më tepër, kjo risi synon përdorimin gjithnjë e më të gjerë të literaturës cilësore ndërkombëtare, duke iu larguar teksteve jocilësorë universitarë, që fatkeqësisht vijojnë të përdoren nga universitetet dhe studentët në Shqipëri.
Në cilat lëndë ka filluar të zbatohet?
Momentalisht është vetëm 1 lëndë: “Institucionet financiare dhe tregjet e kapitaleve”, që zhvillohet në programin e studimit master shkencor “FinancëBankë”, ku ky projekt dhe standard ka filluar të zbatohet. Kjo lëndë përdor një libër të dy autorëve mjaft të njohur, si: Franco Modigliani ( nobelist) dhe Frank J. Fabozzi, i cili është tashmë i përkthyer në shqip, e që përdoret nga shumë universitete në SHBA dhe vende të tjera të BE- së. Për vitin e ri akademik synojmë që të tjera lëndë t’i bashkohen këtij projekti dhe standardi, duke forcuar kështu edhe më shumë cilësinë e procesit akademik në Kolegjin Universitar “Luarasi”.
A do të ketë më shumë transparencë në korrigjimin e provimeve nëpërmjet këtij sistemi?
Patjetër që transparenca në korrigjimin e provimeve nëpërmjet “CleanScore” është e plotë dhe maksimale, ku pedagogu nuk ka asnjë mundësi të ndërhyjë në procesin e vlerësimit të studentit, duke shmangur kështu totalisht subjektivizmin në vlerësimin me notë të studentit. Në finale, ky është dhe thelbi pse ekziston ky projekt.
A shprehen të kënaqur studentët në lidhje me aplikimin e kësaj risie?
Nga komentet dhe vlerësimet e dhëna prej tyre, del se një sistem i tillë shihet shumë pozitivisht dhe me vlerë të shtuar nga studentët, pasi në thelb ky sistem korrigjimi vlerëson me drejtësi dhe paanshmëri gjithkënd, për aq sa student/ i/ ja ka studiuar dhe ka mësuar. Gjithashtu, studentët janë të mendimit se më shumë lëndë duhet të jenë pjesë e këtij projekti dhe standardi. Personalisht mendoj se studentit shqiptar i nevojitet një vlerësim i drejtë për njohuritë e tij dhe mbi të gjitha ai/ ajo ka nevojë të studiojë me literaturë cilësore ndërkombëtare, me qëllim që të jenë sa më të mirëpërgatitur përballë të gjithë sfidave të së nesërmes, jo vetëm brenda Shqipërisë, por dhe jashtë saj. Pikërisht zbatimi i projektit “CleranScore” dhe standardit të lartë që ai vendos përbën një garanci të mirë në këtë drejtim.
Zbatimi i projektit “CleanScore” synon që edhe në Kolegjin Universitar “Luarasi” të vendoset një standard i lartë cilësie dhe transparence, në drejtim të kontrollit të dijeve të studentëve, luftimin e fiktivitetit të notës dhe abuzivizmit