Formula e re për sigurimin e automjeteve, tarifë më e lartë për ata që kanë më shumë aksidente
Zbardhet drafti i AMF, shkon për mendim në Komisionin e Ekonomisë Kompania e sigurimeve do të paguajë 2 mln lekë për çdo person që humb jetën
Agjencia e Mbikëqyrjes Financiare dërgon për mendim në Komisionin e Ekonomisë sigurimin e detyrueshëm në sektorin e transportit. Drafti i plotë është siguruar nga "Gazeta Shqiptare" dhe parashikon sistemin bonusmalus, i cili zbatohet për përcaktimin e nivelit të primit të sigurimit të detyrueshëm motorik, bazuar në historikun e dëmeve të të siguruarit. Sipas draftit, shoqëria e sigurimit është e detyruar të vërë në dispozicion të të siguruarve certifikatën e historikut të dëmeve të 5 viteve të fundit, sipas formatit, metodës, afateve kohore dhe përmbajtjes së përcaktuar me rregulla të miratuara nga Autoriteti. Në draft parashikohet që do të jetë vetë shoqëria e sigurimit që përcakton vetë tarifat e primit të sigurimit të detyrueshëm për mjetet motorike. Ndërsa në lidhje me dëmshpërblimet për aksidentet janë caktuar tarifa dhe afate të reja. Kështu, kërkesat për dëmshpërblim për dëme ndaj pronës me vlerë deri në 100 000 lekë, do të paguhen nga shoqëritë e sigurimit brenda 14 ditëve kalendarike nga data e paraqitjes së kërkesës për dëmshpërblim. Ndërsa, pagesa për humbjen e jetës në aksident do të jetë 2 milionë lekë.
DRAFTI
Ky draft- ligj rregullon sigurimin e detyrueshëm në sektorin e transportit. Sipas draftit, sigurimi i detyru- eshëm në sektorin e transportit përfshin: a) sigurimin e përgjegjësisë së pronarit të mjetit motorik, për dëmet e shkaktuara palëve të treta nga përdorimi i këtij mjeti; b) sigurimin e pasagjerëve nga aksidentet në transportin publik; c) sigurimin e përgjegjësisë së pronarit të mjetit lundrues, për dëmet e shkaktuara palëve të treta
Drejtori i përgjithshëm ekzekutiv, Ervin Koçi, bëri të ditur dje se ky projektligj i është paraqitur Ministrisë së Financave, madje një kopje edhe deputetëve të Komisionit të Ekonomisë. Ligji i ri pritet të mundësojë aplikimin e sistemit bonusmalus në sigurimin e detyrueshëm motorik, si edhe të rregullojë funksionimin e Fondit të Kompensimit për dëmet nga mjetet e pasiguruara. Koçi theksoi edhe njëherë se tregu i sigurimeve është më problematiku nën mbikëqyrjen e këtij institucioni. Ai mbetet i pazhvilluar dhe i varur nga produktet e detyrueshme. Një nga problemet më të mëdha të tregut është funksionimi i Fondit të Kompensimit për dëmet e shkaktuara nga mjetet e pasiguruara. AMF bën të ditur se vlera totale e dëmeve të bartura që nga vitit 2002 kishte arritur në rreth 3 miliardë lekë. Gjatë raportimit në Kuvend, drejtuesit e AMF thanë se shlyerja e tyre pritet të përfundojë brenda këtij viti, ndërsa nuk do të lejohet akumulimi i dëmeve të reja që nuk paguhen me vite. Vonesa në shlyerjen e dëmeve në rast të aksidenteve nga shoqëritë e sigurimeve vijon të mbetet problem. Kryetari i Autoritetit të Mbikëqyrjes Financiare, Ervin Koçi, u shpreh se gjatë 2017- ës janë 417 mln lekë të papaguara dhe për këtë është nisur një inspektim në shoqëritë e sigurimit.