Meta: Çelja e negociatave me BE, e mundur me bashkëpunimin e të gjithëve
Presidenti i Republikës në Gjirokastër: Vëmendje më e madhe për vlerat muzeale "Deri në qershor të përqendrohemi te prioritetet kyçe"
Presidenti i Republikës, Ilir Meta, foli dje për bashkëpunim mes palëve, në mënyrë që të arrihet çelja e negociatave të Shqipërisë me Bashkimin Evropian. Duke folur nga Gjirokastra, Meta tha: "Duke bashkëpunuar të gjithë, është tërësisht e mundshme që rekomandimi pozitiv i Komisionit Evropian të shoqërohet nga një vendim pozitiv i Këshillit të vendeve anëtare". Presidenti Meta shprehu besimin se, "janë të gjitha mundësitë deri në qershor, duke u përqendruar të gjithë në ato kërkesat, të cilat dihen se kanë të bëjnë me përparësitë kyçe të këtij procesi". Meta foli edhe për hapjen e sezonit turistik në Gjirokastër, "është e jashtëzakonshme, sepse gjithmonë ka zhvillime të reja, pozitive dhe ngaherë ka rritje të interesit për Gjirokastrën, e cila është shndërruar në një magnet për turistët vendës e të huaj. Jam i bindur se edhe ky sezon turistik që sapo është çelur do të jetë mjaft i suksesshëm dhe duket tepër premtues, sepse sot kemi takuar përveç qytetarëve, edhe shumë turistë të huaj, të cilët sapo kanë ardhur dhe të cilët paralajmërojnë një sezon të suksesshëm e tepër të mbarë turistik. Ajo që doja të doja të theksoja sot në mënyrë të veçantë është një vëmendje më e madhe për të ruajtur vlerat muzeale, kulturore e historike të jashtëzakonshme që ka Gjirokastra nga rreziku i degradimit dhe i shkatërrimit. Në këtë drejtim është shumë i rëndësishëm një bashkëveprim dhe koordinim i të gjitha institucioneve vendore e qendrore, një mbështetje më e madhe, pasi këto janë vlera të papërsëritshme e të parikthyeshme. Dhe sot, më shumë se asnjëherë tjetër duhet vepruar edhe me më shumë energji, me më shumë angazhim dhe mbështetje, në mënyrë që t'ua lemë si trashëgim edhe brezave të ardhshëm. Pasi janë edhe një burim mirëqenie, përveçse një arsye e fortë për të rritur krenarinë e gjirokastritëve dhe të të gjithë shqiptarëve", tha presidenti Meta. "Mendoj se në Gjirokastër janë bërë mjaft ndryshime dhe zhvillime pozitive, por ka një prapambetje të konsiderueshme do të thosha të reagimit në kohë, të planifikuar, afatgjatë, në planifikimin e
këtij degradimi, prandaj duhet edhe më shumë përqendrim, koordinim, bashkëveprim dhe mbështetje, sot edhe në të ardhmen, sepse e theksoj se janë vlera që nuk mund të rikthehen apo nuk mund të mbrohen më vonë", u shpreh Meta. Ndërsa, i pyetur për lëvizjet e fundit në prokurori, Meta nuk ka dashur të komentojë. "Nuk kam asnjë koment përveç sezonit turistik, i cili ka filluar shumë mbarë si në Skrapar, Përmet, edhe sot në Gjirokastër", tha
kreu i shtetit. Presidenti i Republikës dekoroi doktorin e shquar gjirokastrit Vasil Laboviti ( pas vdekjes) me titullin e lartë "Mjeshtër i Madh" "Për kontributin intelektual e atdhetar, për profesionalizmin dhe humanizmin e pashembullt të treguar në ushtrimin e misionit të tij fisnik si mjek kirurg. Në vlerësim të veprës së tij patriotike, në kushtet e terrorit të egër të pushtuesve, për shpëtimin e qytetit të Gjirokastrës nga masakra naziste". I pyetur për lëvizjet e fundit në prokurori, largimin e kreut të Krimeve të Rënda, Besim Hjadarmataj, Meta nuk ka dashur të komentojë. "Nuk kam asnjë koment përveç sezonit turistik, i cili ka filluar shumë mbarë si në Skrapar, Përmet, edhe sot në Gjirokastër", tha kreu i shtetit.