Kategoritë që përfitojnë nga kompensimi i energjisë elektrike
Instituti i Sigurimeve Shoqërore: Dokumentacioni që duhet të dorëzojnë shtresat në nevojë Sa do të jetë masa për pensionistët e fshatit e qytetit
Të gjitha kategoritë e individëve që marrin pension pleqërie, invaliditeti apo familjar, mund të përfitojnë edhe kompensimin e shpenzimeve nga ndryshimi i çmimit të energjisë elektrike apo lëndëve djegëse. Instituti i Sigurimeve Shoqërore bën me dije se të sipërpërmendurit iu lind e drejta për të marrë këtë lloj kompensimi në masën 350 dhe 700 individëve që jetojnë në qytet. Ndërkohë iu jepet masa prej 200 lekë pensioneve të pleqërisë, invaliditetit dhe familjare, kur përfituesit banojnë në fshat, ndërsa pensionistët e fshatit, kur banojnë në qytet, përfitojnë 350 lekë. Kështu për të marrë kompensimin prej 350 lekësh të interesuarit duhet të dorëzojnë: një deklaratë personale, që plotësohet nga përfituesi pranë Agjencisë Lokale të Sigurimeve Shoqërore, në vendbanimin e tij si dhe një fotokopje e kontratës të energjisë elektrike nga operatori i shpërndarjes së energjisë elektrike. "Dokumentacioni që kërkohet për përfitimin e shtesës prej 700 lekëve: a) Dokumentet e përshkruara në pikën 2; b) Certifikatë familjare, kur ka fëmijë në ngarkim, me kusht që ata të jenë deri në moshën 18 vjeç, dhe kur vazhdojnë shkollën deri në 25 vjeç, duke paraqitur vërtetimin e shkollës. Kur ka persona në ngarkim mbi këtë moshë, duhet të paraqitet dhe vërtetim nga zyrat e punësimit, nga zyra tatimore e Bashkisë dhe komunave dhe nga zyra e tatim- taksave",- thekson ISSH.
SHTRESAT NË NEVOJË
Edhe shtresat në nevojë, sipas VKM- së përkatëse iu lind e drejta e përfitimit të kompensimit nga rritja e çmimit të energjisë elektrike. Këtë masë e marrin kryefamiljarët që përfitojnë pension invaliditeti shtetëror dhe nuk kanë anëtarë të familjes të punësuar në sektorin publik ose të vetëpunësuar në sektorin privat si dhe kryefamiljarët që përfitojnë pension pleqërie shtetëror dhe jetojnë të vetëm ose kanë fëmijë në ngarkim, të cilët janë pa të ardhura. Të interesuarit duhet të dorëzojnë një deklaratë personale, që ndod-
het, pranë Agjencive Lokale të Sigurimeve Shoqërore; një fotokopje të kontratës të energjisë elektrike, lidhur midis OSSH- së dhe personit; si dhe një certifikatë familjare.
Ndërsa për fëmijët mbi moshën 18 deri në 25 vjeç, kërkohet edhe një vërtetim që vazhdojnë shkollën. Masa e përfitimit nga ky kompensim është 640 lekë në muaj e mund të tërhiqet në postën paguese së bashku me pensionin. Ndërkaq, një pjesë e pensionistëve mund të përfitojë kompensim për efekt të heqjes së fashës së konsumit të energjisë elektrike deri në 300KWH në muaj. Këtë kompensim në masën 648 lekë në muaj e marrin kryefamiljarët që përfitojnë pension invaliditeti shtetëror dhe pension invaliditeti të plotë në fshat dhe nuk kanë anëtarë të familjes të punësuar ose të vetëpunësuar në sektorin privat; si dhe kryefamiljarët që përfitojnë pension pleqërie shtetëror ose pension pleqërie fshati, por që janë me banim në qytet dhe nuk kanë anëtarë të familjes të punësuar ose të vetëpunësuar. "Dokumentacioni që kërkohet: a) Deklaratë personale, që ndodhet, pranë Agjencive Lokale të Sigurimeve Shoqërore; b) Fotokopje e nënshkruar e Kartës së identitetit; c) Fotokopje e kontratës të energjisë elektrike, lidhur midis OSSH- së dhe personit; d) Fotokopje e librezës së energjisë, që vërteton se nuk ka detyrime të papaguara; e) Certifikatë familjare",- thotë Instituti i Sigurimeve Shoqërore.
KOMPENSIMI NGA NDRYSHIMI I ÇMIMIT TË BUKËS
Në buxhetin e shtetit është përllogaritur edhe një masë kompensuese për të gjithë ata që preken nga ndryshimi i çmimit të bukës, vajgurit dhe gazit të lëngshëm, në masën prej 150 lekësh. Respektivisht kjo masë pagese përfitohet nga pensionet e pleqërisë, të invaliditetit dhe pensionet familjare të qytetit.