Manjola Xhaxho kalon "në sitën" e vetingut, KPK: Pasuria e ligjshme, rezulton e pastër

Gjykatësja e Tiranës, drejt rikonfirmimit në detyrë

Komisioni

i Pavarur i Kualifikimit zhvilloi ditën e djeshme seancën dëgjimore me gjyqtaren e gjykatës së Tiranës, Manjola Xhaxho, njëkohësisht kandidate për në Këshillin e Lartë Gjyqësor. Trupa Gjykuese e KPK- së, e cila përbëhej nga Etleda Çiftja, Xhensila Pine dhe Valbona Sanxhaktari theksoi se për gjyqtaren Xhaxho kanë kryer hetimet të thelluar për tre kriteret, atë të pasurisë, aftësive profesionale dhe integritetit të figurës. Sipas KPK, ILDKP ka sjellë raport që gjyqtarja Xhaxho ka bërë deklarim të saktë të pasurisë. "S'ka fshehje pasurie. Nga hetimi i thelluar ka munguar deklarata e vitit 2006. Gjyqtarja ka sjellë përgjigje se ka qenë me leje studimore jashtë vendit në atë vit. Nga hetimi i plotë për vlerësimin e pasurisë u mor raport nga ILDKPI. Na rezulton se gjyqtarja ka apartament 2+ 1 në pronësi të prindërve. Apartamenti i blerë nga gjyqtarja dhe i është dhuruar prindërve nga ajo në vitin 2011. Gjyqtarja nuk ka pasuri tjetër. Nga drejtoria e informacionit të klasifikuar rezulton e pastër. KLD ka sjellë vlerësim që është e aftë profesionalisht",- tha relatorja e KPK. Ndërkohë gjykatësja u shpreh se ishte dakord me re- zultatin e hetimit administrativ. "Jam dakord me gjetjet e KPK- së, nuk kam asnjë objeksion. Sigurisht që kërkoj konfirmimin në detyrë",- tha ajo. KPK ka theksuar më tej se i vetmi problem i ngritur për Xhaxhon, e cila është prej 16 vjetësh gjykatëse në Tiranë, ishte mungesa e deklaratës së interesave personale në vitin 2006, por gjykatësja shpjegoi se gjatë atij viti kishte qenë me studime jashtë vendit.