Agron Xhafaj, letër publike: Dorëzohem tek autoritetet italiane, nuk jam shmangur
Vëllai i ministrit: Audio- përgjimi i opozitës, i sajuar
Agron
Xhafaj, vëllai i ministrit të Brendshëm, Fatmir Xhafaj ka marrë dje vendimin për të shkuar vetë tek autoritetet italiane për të vuajtur dënimin. I vendosur në qendër të akuzave së bashku me vëllain e tij ministër, Agron Xhafaj sqaroi dje në një letër: "Kam vendosur që t'u drejtohem vetë autoriteteve italiane të drejtësisë për të ekzekutuar një vendim dënimi penal të tyre kundrejt meje. Kam vendosur ta bëj këtë duke u paraqitur sot në Itali tek autoritetet përkatëse. Edhe pse nuk ka pasur asnjëherë ( nuk ka akoma edhe sot) asnjë kërkesë dhe asnjë interes nga organet e drejtësisë italiane për të ekzekutu- ar këtë vendim, edhe pse unë asnjëherë nuk kam qenë në kërkim për ekzekutimin e këtij vendimi, unë po e kryejë këtë akt. Unë kam gabuar në rininë time. Si jo pak të tjerë. Aspak dhe për asnjë arsye nuk e justifikoj dhe nuk e përligj atë gabim. Edhe pse cilido që ka pasur mundësinë të shohë atë dosje penale dhe ka parë rrethanat e kryerjes së asaj vepre penale, e kupton shumë mirë shkallën e përfshirjes dhe rolin tim në atë histori", u shpreh Agron Xhafaj. Por, shton ai më tej: "Unë jo vetëm që nuk i jam shmangur hetimit dhe gjykimit tim në këtë çështje, por përkundrazi, kam bërë të gjitha përpjekjet e mundshme për të qenë prezent në Itali gjatë hetimit dhe më pas gjatë gjykimit tim. Janë të plota dhe të dokumentuara të gjitha përpjekjet e mia në këtë drejtim. Ishin vetë autoritetet italiane që më liruan pas një muaji ndalimi dhe urdhëruan largimin tim nga Italia". Ai ka sqaruar se ka lënë pranë prokurorisë të gjitha shpjegimet dhe zërin e tij për të verifikuar audion e publikuar nga opozita, të cilën e quan të sajuar.