Rama e Xhafaj shkojnë te Meta, presidenti thërret Këshillin e Sigurisë Kombëtare
Kreu i shtetit: Agjencitë ligjzbatuese të thellojnë luftën ndaj krimit e drogës
Presidenti
i Republikës, Ilir Meta mblodhi dje Këshillin e Sigurisë Kombëtare. Sipas njoftimit për mediat, "çështjet e diskutuara ishin gjendja e sigurisë kombëtare dhe direktiva vjetore e sigurisë së Republikës së Shqipërisë për vitin 2018; kontrolli dhe menaxhimi i integruar i kufijve, lufta kundër krimit të organizuar, terrorizmit dhe emigracionit të paligjshëm; emergjencat civile; siguria e infrastrukturave strategjike portuale dhe aeroportuale dhe mbrojtja kibernetike". Por në fakt, kjo mbledhje vjen në një kohë që opozita ka hedhur akuza ndaj ministrit të Brendshëm, Fatmir Xhafaj, i cili ishte i pranishëm në mbledhje. "Për gjendjen e sigurisë kombëtare dhe direktivën vjetore të sigurisë së Republikës së Shqipërisë për vitin 2018 informoi kryeministri Edi Rama. Për çështjet e tjera informuan anëtarët e tjerë të Këshil- lit të Sigurisë Kombëtare. Presidenti theksoi rëndësinë e domosdoshmërisë strategjike për luftën kundër krimit të organizuar, terrorizmit dhe forcimit të kontrollit të kufijve", thuhet në njoftimin e Presidencës. "Gjithashtu, presidenti shprehu mbështetjen e plotë ndaj agjencive ligjzbatuese për thellimin e luftës pa kompromis kundër trafikut të drogës dhe krimit të organizuar. Po kështu, raportet e Departamentit të Shtetit, Bashkimit Evropian dhe agjencive partnere të specializuara për këto çështje të rëndësishme - nënvizoi Presidenti i Republikës - janë një platformë solide për të reflektuar dhe për të ndërtuar një partneritet të besueshëm, të qëndrueshëm dhe afatgjatë për forcimin e sigurisë kombëtare dhe anëtarësimin në Bashkimin Evropian", përfundon njoftimi.