Skandali me pijet, prokuroria çon për gjykim pronarin e firmës, Xhavit Kasemin dhe 3 punonjës
Dosja, nën akuzë edhe 4 inspektorët e AKU- së në Shkodër
SHKODËR - Prokuroria e Shkodrës ka përfunduar hetimet dhe ka dërguar për gjykim një prej çështjeve më të bujshme të saj, duke marrë si të pandehur 9 persona, ku 8 prej tyre janë persona fizikë dhe 1 person juridik. Pas shfaqjes së pamjeve filmike nga emisioni investigativ "Stop" dhe denoncimeve të shumta për një periudhë prej 8 muajsh janë kryer hetime në lidhje me prodhimin e kundraligjshëm të produkteve ushqimore nga shoqëria "Briland" shpk me administrator Xhavit Kasemin. Pas hetimeve, ka rezultuar se kjo shoqëri prodhonte pije të ndryshme alkoolike dhe joalkoolike, si dhe produkte të tjera ushqimore jashtë çdo lloj standardi, në kushte higjieno- sanitare të papërshtatshme, duke rrezikuar kështu shëndetin dhe jetën e konsumatorëve. Për muaj me radhë shoqëria është kontrolluar nga inspektorët e AKU- së, Shkodër, të cilët në kundërshtim me ligjin e kanë paraqitur situatën dhe ambientin si të përshtatshëm për prodhimin e produkteve ushqimore, duke mos konstatuar asnjë shkelje. Prokuroria nëpërmjet një kërkese prej 55 faqesh ka çuar për gjykim çështjen penale në ngarkim të Xhavit Kasemit, i cili akuzohet për veprat penale "Shkelja e të drejtave të pronësisë industriale", "Prodhimi i kundërligjshëm i artikujve dhe mallrave industrialë dhe ushqimorë", "Fshehja e të ardhurave" dhe "Pastrimi i produkteve të veprës penale ose veprimtarisë kriminale" e të shoqërisë së tij "Briland" shpk., akuzuar për kryerjen e veprave penale "Shkelja e të drejtave të pronësisë industriale", "Prodhimi i kundërligjshëm i artikujve dhe mallrave industrialë dhe ushqimorë" dhe "Fshehja e të ardhurave". Në dosjen në fjalë janë vënë nën akuzë dhe punonjësit e shoqërisë: Syrri Çaku, Fatjon Bushati dhe Sami Haxhija. Ata akuzohen për "Prodhimi i kundërligjshëm i artikujve dhe mallrave industrialë dhe ushqimorë". Gjithashtu, janë nën akuzë dhe inspektorët e AKU të Shkodrës: Abdyl Bajraktari, Edmond Fortuzi, Elvis Raboshta dhe Hilmi Erkoçaj. Këta të fundit akuzohen për veprën penale "Shpërdorim detyre" në bashkëpunim. se. ni.