U kap në Mal të Zi me 1 ton marijuanë, sekuestrohen pasuritë e shkodranit
Policia: Pasuritë i tjetërsoi në emër të motrës, dhëndrit dhe dajës Ndue Vesel Pepaj u arrestua në vendin fqinj si kreu i një organizate të trafikut të drogës
Policia e Shtetit në bash këpunim me prokuror inë e Shkodrës kanë sekuestruar 7 pasuri të paluajtshme në fshatin Bajzë të Malësisë së Madhe në pronësi të Ndue Vesel Pepaj, i cili është arrestuar në Mal të Zi si kreu i një organizate kriminale, që merrej me trafikimin dhe shitjen e lëndëve narkotike. Pepaj u prangos nga policia malazeze në 17 dhjetor 2017, bashkë me 11 persona të tjerë. Ndërkohë, burime zyrtare nga policia dje bënë me dije se Ndue Vesel Pepaj, këto pasuri të sekuestruara i ka ricikluar duke i tjetërsuar në emër të personave të tjerë, sidomos në emër të motrës, dhëndrit dhe dajës së tij. Ai akuzohet për veprën penale të "Pastrimit të produkteve të veprës penale ose veprimtarisë kriminale".
HETIMI
Pas disa muajsh hetime të prokurorisë së Shkodrës në bashkëpunim me njësinë hetimore të Task- Forcës speciale qendrore në Policinë e Shtetit, dje u ekzekutua vendimi i Gjykatës së Rrethit Gjyqësor, Shkodër, e cila pas kërkesës së organit të prokurorisë kishte vendosur sekuestron preventive të 7 pasurive të paluajtshme. Bëhet fjalë për tokë me sipërfaqe rreth 15500 m2 dhe ndërtesa social- ekonomike me sipërfaqe rreth 450 m2, ku përfshihen bar- restorant, hotel "Kavaliero", lavazh dhe dyqan cigaresh në fshatin Bajzë të njësisë administrative Kastrat, Bashkia Malësi e Madhe, në pronësi të shtetasit Ndue Vasel Pepaj dhe familjarëve të tij. Sipas burimeve zyrtare nga policia, sekuestrimi u krye në funksion të hetimeve të procedimit penal të vitit 2018, për veprën penale të "Pastrimit të produkteve të veprës penale ose veprimtarisë kriminale". Mësohet se bazë për fillimin e këtij hetimi ka shërbyer njoftimi i ardhur nga autoritetet e Mali të Zi më 17 dhjetor 2017. Atë ditë ( më 17 dhjetor të vitit që shkoi), rreth orës 16: 00, autoritetet malazeze në kuadrin e operacionit "Mashtrim" (" Trick"), arrestu- an 12 persona, përfshirë edhe shtetasin shqiptar Ndue Vasel Pepaj, banues në Bajzë, Malësi e Madhe, si kreun e një organizate kriminale që vepronte në Mal të Zi dhe që merrej me trafikimin dhe shitjen e lëndëve narkotike.
OPERACIONI ANTIDROGË
Gjatë këtij operacioni janë gjetur dhe konfiskuar 982 kg marijuanë, 1,7 kg heroinë dhe rreth 3 kg përzierës. Sipas policisë malazeze, kjo organizatë kriminale dyshohet se kishte vepruar për një periudhë të gjatë kohore dhe veçanërisht aktive ka qenë që nga 1 janari 2016 në trafikimin dhe shitjen e lëndëve narkotike në nivel ndërkombëtar. Hetimet po zhvillohen në bashkëpunim edhe me Prokurorinë Speciale të Malit të Zi, përfaqësues të së cilës u takuan me autoritetet ditën e fundit në prokurorinë e Shkodrës në funksion të hetimit të kësaj çështjeje dhe të ekzekutimit të letër- porosive së kërkuara në mënyrë reciproke nga autoritet gjyqësore të të dy shteteve.
SEKUESTRIMI I PASURISË
Hetimi dhe sekuestrimi i aseteve është bërë, pasi dyshohet se këto pasuri janë produkt i veprimtarisë kriminale të trafikimit të narkotikëve, të kryer nga shtetasi Ndue Vasel Pepaj. Sipas hetuesve të çështjes, më pas Pepaj këto pasuri i ka ricikluar duke i tjetërsuar në emër të personave të tjerë, sidomos në emër të motrës, dhëndrit dhe dajës së tij. Zbatimi i vendimit të gjykatës për ekzekutimin e sekuestrimit u bë në bashkëpunim me Drejtorinë Vendore të Policisë Shkodër, Drejtorinë e Hetimit Tatimor Shkodër dhe Agjencinë e Menaxhimit të Aseteve të Sekuestruara dhe Konfiskuara pranë Ministrisë së Financave dhe Ekonomisë, e cila mori në administrim pasuritë e sekues- truara. Hetimet për këtë çështje vazhdojnë, me qëllim dokumentimin e plotë të veprimtarisë kriminale.