Xhafaj: Jap dorëheqjen nëse audio- përgjimi del i vërtetë

Audio- përgjimi dërgohet në Itali, ministri i Brendshëm: Marr çdo përgjegjësi "Në rast të kundërt Basha të dorëhiqet e të përballet me ligjin"

Ministri i Brendshëm Fatmir Xhafaj deklaroi se do të japë dorëheqjen si ministër, nëse audio- përgjimi ku mendohet të jetë zëri i të vëllait del i vërtetë. Në një reagim në rrjetin social, "Tuitter" Xhafaj shkroi dje, një ditë para protestës së opozitës: "Bashkëqytetarëve të thirrur në protestë, u them sot: Nëse audiopërgjimi i bërë publik nga PD, do të rezultojë i vërtetë, unë do të marr çdo përgjegjësi morale, politike e ligjore, përfshi dhe largimin nga funksioni i ministrit të Brendshëm. Jam i gatshëm ta bëj këtë pa hezitim". Por, shtoi ai, "nëse provohet e kundërta, atëherë duhet që Lulëzim Basha të dorëhiqet dhe të përballet me ligjin. Pyeteni: A është ai i gatshëm për këtë sfidë?"

Sipas ministrit të Brendshëm, "e vërteta është vetëm një, dhe vetëm një në këtë rast. Ai që nuk është në anën e të vërtetës, duhet të përgjigjet. Këtë e kërkon interesi i ligjshëm i qytetarëve". Në postimin e tij, Xhafaj shkruan në fund se do të presë drejtësi deri në fund. Një ditë pasi prokuroria njoftoi zyrtarisht se si po zhvillohen hetimet për audio- përgjimin e transmetuar nga Partia Demokratike, audio- përgjimi është dërguar për ekspertizë në Itali. Prokurorët e çështjes e kanë dërguar audiopërgjimin përmes një letër porosie Ministrisë së Drejtësisë italiane. Do të jetë kjo ministri, e cila më pas do të zgjedhë laboratorin, ku do të kryhet ekspertiza. Sipas Report Tv një nga prokurorët e kësaj çështjeje, Përparim Kulluri, është nisur dje, drejt Italisë, për të marrë në pyetje Agron Xhafajn, i cili u vetëdorëzua një javë më parë tek autoritetet italiane për të vuajtur dënimin përfundimtar dhënë nga Gjykata Prokurori i përgjithshëm i SHBA, Jeff Sessions tha dje, në Kroaci, në prani edhe të kryeprokurores shqiptare, Arta Marku se pranë Ambasadës Amerikane janë dërguar 4 prokurorë dhe disa të tjerë në Bosnje Hercegovinë, Kroaci, Kosovë, Maqedoni dhe Serbi për të ndihmuar policitë e këtyre vende. Ish- kryeministri Sali Berisha postoi dje, një mesazh në faqen e tij, në Facebook, ku denoncohet fakti se "asnjë autoritet zyrtar italian nuk ka marrë përsipër ekspertizën", për audio- përgjimin e vëllait të ministrit, Agron Xhafaj, pasi sipas denoncimit, ai që është lënë në prokurori nuk është zëri i tij.