Sarandë, IKMT kallëzon kryebashkiaken Floriana Koka
Abuzuan me detyrën, paditen edhe ish- kryebashkiaku Edmond Gjoka e ish- shefi i Urbanistikës, Panajot Gunari Dha leje në kundërshtim me ligjin për ndërtimin e një kompleksi në bregdet
Inspektorati Kombëtar i Mbrojtjes së Territorit ka kallëzuar në prokurori kryetaren e Bashkisë së Sarandës, Floriana Koka. Në një njoftim për shtyp, IKMT bën me dije se kryebashkiakja e qytetit bregdetar e zgjedhur si përfaqësuese e socialistëve në zgjedhjet e vitit 2015, dyshohet se ka kryer dy vepra penale. Konkretisht, Koka akuzohet për "Shpërdorim detyre" dhe "Falsifikim të dokumenteve". Ndërkohë, bashkë me Floriana Kokën janë kallëzuar penalisht edhe ishkryetari i Bashkisë së Sarandës, Edmond Gjoka dhe ish- shefi i Urbanistikës, Panajot Gunari. Në kallëzimin e bërë nga Inspektorati i Mbrojtjes së Territorit thuhet se këta zyrtarë kanë dhënë leje në kundërshtim me ligjin për ndërtimin e një kompleksi multifunksional në zonën bregdetare. "Zyrtarët janë përgjegjës për miratimin në kundërshtim me ligjin të lejes së ndërtimit në favor të firmës ' Daed' sh. p. k dhe zgjatjen e afatit të kësaj lejeje për objektin ' Kompleks multifunksional' në zonën bregdetare, pranë Kanalit të Çukës", thuhet në njoftimin zyrtar të IKMT. Mësohet se leja për objektin shtatëkatësh është dhënë në dhjetor të vitit 2010 për firmën ndërtuese, "Dinamika SHPK". Ajo është firmosur nga kryetari i atëhershëm i Bashkisë së Sarandës, Edmon Gjoka. Për shkak të kalimit të afateve është kërkuar rinovimi i lejes së ndërtimit dhe në dhjetor të vitit të kaluar, kjo leje është miratuar. Ndërsa ka ndryshuar edhe kompania ndërtuese, emri i të cilës është "Daed" sh. p. k. Leja e shtyrjes së afateve është firmosur nga kryetarja aktuale e Bashkisë së Sarandës, Floriana Koka. Sipas IKMT, kallëzimi është iniciuar nga një ankesë e bërë nga familja Xhaxhiu, por edhe nga shoqëria "Agikons", e cila ka ndërtuar një kompleks multifunksional i njohur edhe si "Bougainville Bay". Nuk është hera e parë që kryetarja aktuale e Bashkisë së Sarandës akuzohet në lidhje me shkeljen e ligjit. Floriana Koka u denoncua nga Kontrolli i Lartë i Shtetit edhe një vit më parë, për abuzim me fondet publike. Bashkë me kryebashkiaken Floriana Koka, IKMT ka kallëzuar penalisht edhe ish- kryetarin e Bashkisë së Sarandës, Edmond Gjoka dhe ish- shefin e Urbanistikës, Panajot Gunari, të cilët akuzohen për "Shpërdorim detyre" dhe "Falsifikim dokumentesh". Gjoka ( përfaqësues i PDsë) ka qenë kryebashkiak në periudhën 2003- 2011. Gjithashtu, Panajot Gunari ka qenë shef i Urbanistikës po në këtë periudhë. Më 15.02.2018, ky i fundit është dënuar nga Gjykata e Apelit Gjirokastër me 1 vit burgim për "Shpërdorim detyre" për një tjetër kallëzim penal ndaj tij.