Nuk justifikonte 480 mijë dollarë, ish- gjyqtari kërkon kthimin në detyrë
Fatos Lulo i drejtohet KPA: Kam prova
Ish- gjyqtari i Gjykatës Kushtetuese, Fatos Lulo, ka ankimuar shkarkimin e tij nga detyra. Në një kërkesë të depozituar në Kolegjin e Posaçëm të Apelimit, Lulo ka kërkuar zhbërjen e këtij vendimi dhe rikthimin në detyrë. Në kërkesën e tij, Lulo mësohet se ka kërkuar që shqyrtimi i ankimimit të bëhet në një seancë me dyer të hapura. Ndër të tjera mësohet se ish- gjyqtari do të paraqesë prova që rrëzojnë vendimin e KPK, që nuk justifikonte pasurinë. Kujtojmë se gjyqtari i parë që u thirr përpara komisionit për t'u dëgjuar, ishte Fatos Lulo, anëtar i Gjykatës Kushtetuese. Lulo u përfaqësua nga avokati mbrojtës Ardian Visha. Gjatë seancës janë nxjerrë pretendime se në bazë të një hetimi administrativ 5- mujor ndaj Fatos Lulos, ky i fundit nuk justifikon me burime të ligjshme pasurinë e tij. Duke cituar raportin e përcjellë në KPK nga ana e Inspektoratit të Lartë të Deklarimit dhe Kontrollit të Pasurisë, relatorja Etleda Çiftja tha se për subjektin e rivlerësimit Fatos Lulo ka mungesë të burimeve financiare të ligjshme dhe deklarim të rremë të pasurisë. Gjithashtu, KPK thotë se gjyqtari ka përfituar 200 mijë dollarë dhuratë nga motra, Drita Lulo, konkretisht 100 mijë dollarë cash dhe një zyrë në rrugën e Durrësit për zotin Lulo. Në lidhje me këtë fakt, avokati i gjyqtarit, Ardian Visha, është shprehur se burimi i pasurisë së klientit të tij është e motra, Drita Lulo, e cila i ka dhuruar shuma parash dhe apartamente, si dhe shumën prej 480 mijë dollarë kanadez, të cilën gjyqtari ia ka marrë hua dhe ia ka kthyer sërish. Më tej avokati theksoi se Lulo në vitin 1997 i ka dhuruar motrës së tij biznesmene apartamentin e prindërve. Më pas motra që është ndërtuese i ka dhënë 100 mijë dollarë për shkollimin e fëmijëve dhe zyrën për punën e tij që llogaritet me vlerë 100 mijë dollarë. Ndërkohë sipas KPK Lulo ka shmangur pagesën e taksave në vitet ' 94-' 97, kohë kur ishte avokat. Por avokati Ardian Visha u shpreh se klienti i tij disponon librezën ku provon se ka paguar taksat. "Për periudhën e viteve ' 90, kur ishte avokat, është e padrejtë të gjykosh të ardhurat kur zyra e Tatimeve nuk ka të dhënat. Për këtë ILDKP nuk mundet dot të pretendojë se nuk ka burim të ardhurash. Pasuritë e paluajtshme të Lulos janë shtëpia ku banon dhe një zyrë. Është tërësisht një ide biznesi e tij e parealizuar pasuria 480 mijë dollarë në Kanada", deklaroi Visha.