Vrasja makabre në Piaçenca, nëna e 2 fëmijëve u godit dhjetëra herë në trup
ITALI – Afro një javë pas vrasjes shqiptares Elca Tereziu, zbardhen detaje të reja në lidhje me ngjarjen e rëndë të ndodhur në Piaçenca të Italisë. Mediat e vendit fqinj bëjnë me dije se pas kryerjes së autopsisë, ka rezultuar se Tereziu ka pasur një vdekje të tmerrshme. Nëna e dy fëmijëve ka pësuar dhjetëra goditje me thikë në trup e qafë nga bashkëshorti i saj. Ndërsa, prerjet në duar dhe parakrahë tregojnë për tentativat e saj për t’u mbrojtur. Dy ditë më parë, autori i krimit, Xhevdet Mehmeti iu është përgjigjur pyetjeve të gjykatëses Stefania Di Rienzo. 57- vjeçari shqiptari tregoi ngjarjen tragjike të së dielës, duke ripërsëritur atë që u kishte thënë hetuesve mbrëmjen mes 27 dhe 28 majit. Avokati i tij është shprehur se 57- vjeçari e ka kuptuar veprimin e rëndë që ka kryer dhe ka një ndjenjë të fortë turpi dhe faji ndaj dy djemve të tij 19 dhe 17 vjeç. “Pavarësisht se ka ripërsëritur se gruaja kishte një karakter agresiv, ai është i ndërgjegjshëm se nuk duhet ta kishte vrarë dhe se ajo nuk meritonte atë që i bëri”, ka thënë avokati. Mehmeti ka treguar për një martesë të vështirë, me sherre të vazhdueshme për shkak të xhelozisë së gruas. Sipas avokatit, ai nuk është përpjekur në asnjë mënyrë që të justifikohet për atë që ka bërë dhe është i penduar. Ndërkohë, akuzës së vrasjes me dashje, autoritetet italiane i kanë shtuar edhe atë të keqtrajtimit në familje, ndonëse gruaja 52- vjeçare nuk e kishte denoncuar kurrë në polici. Ajo mësohet se kishte kërkuar ndihmë vetëm një herë, por më pas e kishte mohuar faktin se ishte dhunuar nga i shoqi.