Debati i plotë në komision, Ylli: Ju vratë, Boçi: Ti gëzove
Sherri te "Mediat", akuzat për protestat e 26 majit 2018 dhe 21 janarit 2011 "Halabak, legen, langaraq", përplasja mes deputetëve
Deputetët e mazhorancës dhe të opozitës debatuan ashpër dje në Komisionin e Medias ku ishte parashikuar seanca dëgjimore me gazetarin, Bledi Kasmi. Opozita akuzoi se u ushtrua dhunë ndaj protestuesve në 26 maj para Ministrisë së Brendshme, ndërkaq mazhoranca risolli në vëmendje katër protestuesit e vrarë më 21 janar 2011 para Kryeministrisë. Akuzave të ndërsjella mes deputetëve në komision ia lanë vendin fyerjet. Tensioni shoqëroi jo pak edhe kryetaren e komisionit, Albana Vokshin, së cilës iu desh të mbante nën kontroll edhe deputetët e saj. Demokratët u shprehën se policia ka dhunuar Kasmin në protestën e 26 majit para Ministrisë së Brendshme, ndërsa socialistët kanë risjellë në vëmendje 21 janarin ku u vranë 4 protestues. Por me foto të 21 janarit në duar, deputeti socialist Fidel Ylli donte të tregonte se Kasmi thjesht po viktimizohej e ishte nga ata gazetarë që në 21 janar të 2011- ës i quajti puçistë kolegët e tij që bënin detyrën. Pikërisht kjo acaroi demokratët në komision, të cilët nga ana tjetër akuzuan kryeministrin Edi Rama se ushtroi dhunë në protestën e 26 majit. Pas raportimit të Kasmit, deputeti socialist, Fidel Ylli kërkoi fjalën, por Vokshi i kërkoi të priste radhën. Ylli përmendi protestën e 21 janarit ku siç tha ai u plagos një gazetar, ndërsa katër kolegë të tjerë të tij u shpallën nga Sali Berisha puçistë pse ndodheshin në ambientet e një kafeje përballë Kryeministrisë. Por i menjëhershëm ishte reagimi i Luçiano Boçit dhe gjatë debatit me Fidel Yllin ata i drejtohen njëri- tjetrit me fjalët ' rrugaç', ' halabak' dhe ' ordiner'. Por sipas tij, ndonëse ishte pa mikrofon ai iu përgjigj me të "njëjtën monedhë" socialistit Fidel Ylli, i cili sipas tij kishte ardhur të bënte të fortin dhe kishte një skenar të qartë të parapërgatitur. "Në momentin që ai na etiketoi jeni vrasës, nuk durova dot, aty kundërshtia ime ishte e fortë. Ia ktheva duke thënë se jeni ju të tillë, por nuk e priti mirë. Më erdhi keq që isha pa mikrofon. Ai mori pozicionin e të fortit, e ndjen vetën shumë të fu- qishëm dhe për të këto mund të cilësohen si gjëra të zakonshme",- tha Boçi. Demokrati tha se e gjithë kjo situatë u krijua për të shmangur vëmendjen nga çështja. "Ishte i parapërgatitur ai, kishte ardhur me kopjen e gazetës, iu referua gazetës për të nervozuar mbledhjen për ta nxjerrë nga fokusi",- deklaroi z. Boci.
DËSHMIA
Me fashë në kokë, kryeredaktori i RD- së, Bledi Kasmi, dje dha dëshminë e tij para Komisionit të Medias për dhunën në protestën e opozitës. Duke iu përgjigjur deputetëve të PS- së, ai u shpreh se nuk ka goditur asnjë efektiv, dhe se për të kuptuar të gjithë ngjarjen duhen të gjitha pamjet dhe jo vetëm një sekuencë, duke theksuar dhe një herë se ishte duke kryer detyrën. "Nuk kishte zgjidhje tjetër përveçse të vetëmbrohej. Një nga këto zgjedhje ishte dhe ajo që zgjidha unë, të vetëmbrohesha, duke vendosur duart tek bandiera e hekurt dhe duke moslejuar precipitimin e dhunës së mëtejshme. Dua t'ju kujtoj edhe nga fotografitë, janë shumë gazetarë që kanë qenë në vijën e parë dhe nuk e di pse shkopi i hekurt më përzgjidhi vetëm mua. Janë fotografitë që tregojnë që gazetaret ishin mes protestuesve. Në këto kushte është detyrë e gazetarëve që të ndodhen aty ku ndodh lajmi. Në spital më ka ardhur drejtori i policisë, zoti Veliu, më ka vizituar dhe është mirëpritur nga ana ime dhe familjarët e mi. E mora mesazhin e drejtorit si një ndërhyrje për të arritur një lloj paqtimi për atë që kishte ndodhur. Zotëria më tha që kishte ardhur për situatën shëndetësore. Në ato momente i shpjegova se u godita nga një shkop gome shumë i fortë. Ka ndërhyrë dhe më ka thënë që shkopi i gomës nuk shkakton çarje në kokë. Aty e kuptova se vizita e tij nuk kishte qëllim që të dënonte dhunën dhe të distancohej, por kishte si qëllim të manipulimit të së vërtetës",- tha z. Kasmi. Deputetët e opozitës do të depozitojnë në Kuvend një draft rezolutë për dhunën ndaj gazetarëve. Kryetarja e Komisionit të Medias, Albana Vokshi i bëri thirrje edhe mazhorancës që të bashkohen me opozitën në këtë nismë.