Pakti, Berisha: Grekët po u imponohen shqiptarëve për detin
Ish- kryeministri flet për tradhtinë kombëtare: Si falsifikuan Skapi dhe spiuni Muçollari "Si kërcënoi Rama për largime imediate nga Athina"
Ish- kryeministri Berisha paralajmëroi dje se për marrëveshjen për detin, pala greke po imponohet duke vendosur në tryezë një propozim për të cilin nuk kërkon asnjë diskutim. Jashtë sallës së Kuvendit, ishkryeministri Berisha akuzoi se ky është tregues i aktit të fundit të tradhtisë të bërë nga kryeministri Edi Rama dhe ministri i Jashtëm, Ditmir Bushati. Ishkryeministri Berisha zbardhi disa zhvillime të rëndësishme që sipas tij janë bërë në kurriz të Shqipërisë. "Grekët në mënyrën më arrogante dhe prepotente i kanë dorëzuar palës shqiptare marrëveshjen përfundimtare dhe i kanë thënë: Merreni se për këtë s'ka asnjë koment, asnjë diskutim. Pra, që s'mund ta komentojmë e diskutojmë. Ishulli Othon merr fuqi të plotë, si për ujërat territoriale, ashtu edhe për zonën ekonomike. Ai ishull që bëri zhurmë pala greke i bën të qartë palës shqiptare se ishulli ka të gjithë fuqinë si një ishull të banuar", deklaroi z. Berisha. Si fakt domethënës për besueshmërinë e burimeve që citon, ish- kryeministri përmend edhe deklaratën e bërë nga ministri grek i Mbrojtjes. "Kamenos është një ekstremist, ka thënë se Greqia do të zgjerojë ujërat territoriale. Ndaj kujt do t'i zgjerojë? Sigurisht ndaj Shqipërisë", u shpreh z. Berisha. Ish- kryeministri akuzoi dy bashkëkryetarët e grupit negociator për palën shqiptare se duke marrë urdhra direkte nga kryeministri Rama dhe ministri i Jashtëm po anashkalojnë propozimet që janë diskutuar në dy raundet e negociatave mes dy ekipeve. "Disa anëtarë të delegacionit kanë shprehur refuzimin e plotë, kanë bërë letra për shefat e tyre ku i njoftojnë për imponimin që kërkon të bëjë pala greke. Skapi famoz dhe agjenti Meçollari arrinin që të falsifikonin edhe minutat e diskutimeve, të bindin për të firmosur letra pasi janë hequr gjërat nga aty. Dy persona, secili më i zi se tjetri, Skapi famoz dhe spiuni Meçollari, i njohur se punon në çdo rast kundër Shqipërisë. Nga Edi Rama, anëtarët kanë marrë kërcënime për largime imediate nga Athina dhe bisedime", u shpreh z. Berisha. Në replikë me Berishën, kreu i grupit socialist, Taulant Balla tha se çështja e kufirit me Greqinë është një makth për Berishës. "I them shumë qartë, makthi yt Sali për marrëveshjen me Greqinë nuk të shpëton dot. I vetmi tradhtar për marrëveshjen me Greqinë je ti Sali", deklaroi z. Balla. Dy ditë më parë, ministri i Mbrojtjes i Greqisë tha se vendi i tij do të zgjerojë kufijtë detarë, por pa specifikuar hapësirën konkrete. Në fazën aktuale, dy ekipet negociatore të të dyja vendeve kanë zhvillu- "Grekët në mënyrën më arrogante dhe prepotente i kanë dorëzuar palës shqiptare marrëveshjen përfundimtare dhe i kanë thënë: Merreni se për këtë s'ka asnjë koment, asnjë diskutim. Pra, që s'mund ta komentojmë e diskutojmë", tha z. Berisha.
ar një takim në Tiranë dhe një në Greqi pa bërë asgjë publike për çka është arritur. Ata janë mjaftuar me deklarata të dakordësuara se ka frymë të mirë bashkëpunimi.