Ruçi kujton kooperativat: Alergjia politike s'mund të pengojë ekonominë
Kreu i Kuvendit nënshkruan memorandum me Universitetin Bujqësor të Tiranës "Konsolidimi i pronës bujqësore të përfundojë deri në 2021"
Kryetari i Kuvendit, Gramoz Ruçi bëri të ditur dje se po inkurajon qeverinë që procesi i konsolidimit të pronës bujqësore të përfundojë jo më vonë se viti 2021. Sipas tij, kjo masë do të ulë pasigurinë për pronën bujqësore. Ruçi ishte dje në Universitetin Bujqësor të Tiranës, ku nënshkroi memorandumin e bashkëpunimit midis Kuvendit të Shqipërisë dhe Universitetit Bujqësor të Tiranës, i cili ka për qëllim promovimin e punës kërkimore- shkencore. Gjatë fjalës së tij, në këtë aktivitet, kreu i Kuvendit kujtoi edhe organizimin e bujqësisë në kooperativa duke thënë: "Kooperimi në bujqësi është ende në nivele embrionike. ' Alergjia politike' ndaj ishkooperativave nuk është më një argument që të pengojë ' logjikën racionale ekonomike' të kooperimit dhe krijimin e ekonomisë së shkallës në bujqësi. Po ju risjell shprehjen që ekonomistët e njohin mirë: "Është ekonomia, or mik"!", u shpreh kreu i Kuvendit, duke kujtuar se kjo nuk ka të bëjë më me një term politik, por është çështje e zhvillimit ekonomik. "Gjatë termit qeverisës 20132017, sipërfaqja e tokës bujqësore nën sistemin e vaditjes u dyfishua, por ende ka mungesë të sistemeve te ujitjes. Kanalet dhe rezervuarët për ujitje duhet të mirëmbahen dhe kjo kërkon më shumë vëmendje e burime. Unë personalisht po këmbëngul që qeveria ta ralizojë objektivin e saj programor që në vitin 2021 të ketë "Ujë në çdo parcelë" dhe, krahas vaditjes, të përmirësohet sistemi i kullimit përmes decentralizimit dhe rritjes së investimeve. Bujqësia e zhvillimi rural kërkojnë mbështetje edhe më të fuqishme nëpërmjet subvencioneve", u shpreh Ruçi më tej në fjalën e tij.
Ai tha se programi qeverisës, i miratuar nga Kuvendi, parashikon që në katër vitet e ardhshme për zhvillimin e zonave rurale do të financohen mbi 25 miliardë lekë, me fokus mbështetjen e sektorit bujqësor, mbështetjen e fermerëve dhe rritjen e aksesit në tregje dhe përmirësimin e infrastrukturës. "Kuvendi - shtoi Ruçi më tej - ka parashikuar dhe kalendarizuar dhënien e kësaj mbështetjeje buxhetore, por edhe po kontrollojmë efiçencën dhe ndikimin e saj për bujqësinë dhe fermerët". "Ne po bëjmë kujdes që subvencionet dhe mbështetja për bujqësinë të shërbejë si incentiv e nxitje për rritjen e kooperimit, zhvillimin e ekonomisë së shkallës, rritjen e produktivitetit, konkurrencës dhe sigurisë ushqimore. Ne po bëjmë ligje, marrim masa e kontrollojmë qeverisjen që mbështetja financiare për bujqësinë të shkojë te fermerët, jo te sekserët e abuzuesit, që janë mësuar e lejuar të pasurohen duke grabitur fondet për mbështetjen e fshatarëve shqiptarë, që rraskapiten në vapë e në të ftohtë", theksoi kreu i Kuvendit.