Vdekja e 16- vjeçares Anagnosti, arrestohet taksisti Spiro Papa, që e transportoi nga Saranda në Janinë
GREQI - Gjykata e Janinës ka vendosur dje masën "Arrest me burg" për taksistin Spiro Papa, i cili shoqëroi me makinë 16- vjeçaren Konstandina Anagnostin që humbi jetën në nëntor të vitit 2014. Mediat greke raportojnë se prokurori i çështjes kërkoi që taksisti të qëndrojë në qeli deri sa të zbardhet ngjarja, kërkesë e cila u pranua nga gjykata. Nuk dihet nëse autoritetet e Janinës kanë prova të reja në lidhje me hetimin e nisur katër vite më parë. Mësohet se para dy ditësh, Prokuroria e Janinës thirri 7 dëshmitarë, mes tyre edhe nënën e dhe motrën e minorenes, e cila humbi jetën në rrethana të mistershme. Taksisti që u la në burg ka deklaruar pas ngjarjes se më 15 nëntor të 2014- ës, se ai dhe Konstandina Anagnosti fillimisht shkuan tek dentisti në Sarandë. Gjatë kthimit për në Janinë ku banonte me të ëmën, 16vjeçarja humbi ndjenjat në makinë dhe mbërriti pa jetë në spital. Ekspertiza mjekoligjore në Shqipëri doli në konkluzionin se vajza humbi jetën nga shkaqe natyrale dhe për rrjedhojë pushoi hetimet. Por, babai i vajzës, Jorgo Anagnosti s'pranoi rezultatet e hetimeve në Shqipëri. Ai bëri denoncim në Janinë, ku hetimet aty dolën me të tjera konkluzione. Më 23 mars 2018, mjeku grek që bëri autopsinë e minorenes tha se Konstandina Anagnostit i ishin hequr organet vitale në mënyrë joprofesionale dhe jashtë çdo standardi të mjekësisë ligjore. Sipas tij, nga trupi i 16- vjeçares mungonte baza e gjuhës, epiglotisi, trakeja, laringu, mitra dhe truri. Kurse në gjakun dhe në analizat e urinës që iu bënë, u konstatuan sasi të larta të likodainës ( lloj anestezie). Mjeku- ligjor i Universitetit të Janinës ishte habitur nga metoda joprofesionale e ekspertizës që i ishte bërë 16vjeçares në Shqipëri. Ai madje ka kërkuar para hetuesve grekë edhe bërjen e një testi gjenetik për t'u identifikuar organet që pala shqiptare ka dërguar për analiza në Greqi. Gjatë gjithë kësaj kohe nga dita që iku nga jeta Kostandina, i ati, Jorgo Anagnosti ka filluar një luftë të madhe për drejtësi. Ai kërkon zbardhjen e së vërtetës së vdekjes të së bijës dhe të ndëshkohen nga ligji personat përgjegjës.