Pakti me Greqinë, Ilir Meta: Pres informacione më të plota e serioze
Presidenti kërkon plotësimin sa më shpejt të vakancës në Gjykatën Kushtetuese "Me Ramën diskutuam për finalizimin sipas Kushtetutës"
Presidenti i Republikës, Ilir Meta tha dje, se pret informacione më të plota e serioze nga Ministria e Jashtme lidhur me marrëveshjen për detin me Greqinë. Një ditë pas takimit me kryeministrin Edi Rama, Meta sqaroi për gazetarët: "Aktualisht jemi në një proces për të marrë vendime të mëtejshme, pasi Institucioni i Presidentit ka kërkuar dhe pret informacione edhe më të plota nga Ministria e Punëve të Jashtme, informacione këto që duhet të vijnë sipas standardeve më serioze që meriton rëndësia e kësaj çështjeje". Presidenti Meta ka theksuar rëndësinë që ka zgjidhja e kësaj çështjeje, sepse është shumë e rëndësishme për të dyja vendet, jo vetëm si tejkalim i një problemi të mbartur, por edhe si çelje e mundësisë dhe perspektivës për menaxhimin dhe shfrytëzimin e këtyre të mirave qytetare apo natyrore. Presidenti Meta informoi se në takimin me kryeministrin Rama është diskutuar edhe për ecurinë e negociatave me Greqinë, por kryeministri nuk kishte shkuar për të informuar për ecurinë e tyre, sepse ai nuk është përgjegjës apo negociator i drejtpërdrejtë në këtë çështje. "Me kryeministrin kemi diskutuar duke bërë një vlerësim të situatës së deritanishme dhe perspektivës për të ecur drejt mundësisë së finalizimit të një marrëveshjeje sa më shpejt të jetë e mundur, por gjithmonë në respekt të Kushtetutës së Republikës së Shqipërisë dhe të vendimeve të Gjykatës Kushtetuese". Meta tha se çështja e komunikimit deri më tani sa i takon informacioneve ka qenë me Ministrinë për Punët e Jashtme dhe Europës, pasi ajo ka qenë dhe është ministria përgjegjëse dhe koordinatorja e këtij procesi. "Ne jemi jo vetëm në bashkëpunim apo dialog të vazhdueshëm, por edhe në një marrëdhënie tepër korrekte dhe të qartë dhe formale për sa i takon ndjekjes së angazhimeve dhe përmbushjes së tyre të deritanishme nga Ministria e Punëve të Jashtme",- u shpreh Meta. Presidenti i Republikës, ka evidentuar se të gjitha vendimet e Institucionit të Presidentit mbi këtë çështje do të jenë në
përputhje me Kushtetutën dhe në përputhje dhe me përgjegjësitë që i takojnë këtij institucioni ashtu sikurse edhe të gjithë institucionet e tjera kanë
përgjegjësitë e tyre të cilat do t'i ushtrojnë në kohën e duhur. Presidenti Meta, ka theksuar dhe një herë se "është e rëndësishme që në këtë çështje të ecim në mënyrën më transparente më të përgjegjshme pasi është një çështje në interes publik, është një çështje në interes kombëtar, por padyshim që është edhe një çështje që ka kontributin e vet në gjithë rolin dhe angazhimin e Shqipërisë si një vend që punon për fqinjësi të mirë, për stabilitet dhe për bashkëpunim rajonal". I pyetur në lidhje me gjendjen aktuale të bllokimit dhe mosfunksionimit të Gjykatës Kushtetuese, ka nënvizuar rëndësinë që ka përfundimi nga institucionet e rivlerësimit kalimtar, pra të institucioneve të vetingut të të gjitha procedurave për të gjithë anëtarët e Gjykatës Kushtetuese që janë shqyrtuar në shkallën e parë, por që ende nuk janë marrë në shqyrtim përfundimtar. Përfundimi i këtij procesi është i domosdoshëm që të kemi sa më shpejt një Gjykatë Kushtetuese funksionale dhe të përgjegjshme, për t'i dalë për zot Kushtetutës së vendit dhe të gjithë debateve lidhur me kushtetutshmërinë e ligjeve, apo të akteve të ndryshme. Presidenti i Republikës ka vënë theksin në mesazhin e tij për plotësimin sa më shpejt të vakancave përfundimtare të krijuara në trupën gjyqësore të Gjykatës Kushtetuese, për të cilën janë hapur procedurat e konkurrimit që prej muajit shkurt të këtij viti nga Institucioni i Presidentit të Republikës dhe më pas edhe nga Kuvendi.
Presidenti Republikës ka përcjellë edhe një herë mesazhin dhe kërkesën që Këshilli i Emërimeve në Drejtësi duhet të funksionojë sa më shpejt, për të vlerësuar kandidaturat, të cilat janë paraqitur në përputhje me procedurat kushtetuese e ligjore, si nga Presidenti i Republikës, ashtu edhe nga Kuvendi i Shqipërisë. Sa i përket çeljes së negociatave, Meta tha: "Unë mendoj se në cilindo rast çelja e negociatave e ndihmon Shqipërinë që të adresojë edhe më mirë, edhe më me efikasitet luftën kundër korrupsionit dhe kundër krimit të organizuar, si dhe reformën në administratën publike". Sipas tij, "çelja e negociatave, ashtu sikurse edhe vetë opozita pavarësisht nga dallimet apo kritikat që ka ndaj qeverisë, e ka thënë besoj në mënyrë të qartë edhe konstruktive që çelja do ta ndihmojë Shqipërinë për t'i adresuar këto fenomene më mirë".