Skandali, PD: Rama shpall "Qytetar Nderi" atentatorin e Azem Hajdarit
Zbardhet propozimi që kryebashkiaku i Hasit i ka bërë këshillit bashkiak për Gafurr Mazrekun Noka: Kryeministri të tërheqë vendimin sa nuk është vonë
Partia Demokratike de noncoi dje se krye bashkiaku i Hasit ka propozuar dhënien e titullit "Qytetar Nderi" për atentatorin e liderit të demokracisë, Azem Hajdari. 21 vite pasi qëlloi me armë në parlament deputetin Azem Hajdari, në 18 shtator të 1997, socialisti Gafurr Mazreku propozohet të shpallet "Qytetar Nderi" nga ana e Këshillit Bashkiak të Hasit, me motivacionin "Personalitet, intelektual për kontributin e pashoq në pushtetin vendor". Dokumenti u publikua dje nga Partia Demokratike, e cila përmes deputetit Flamur Noka akuzoi kryeministrin Rama se qëndron pas këtij vendimi, që e cilësoi skandaloz. Noka i bëri thirrje Ramës ta tërheqë menjëherë këtë vendim. Deputeti i Kukësit bëri thirrje që të ndalej kjo gjë, pasi sipas tij, Azem Hajdari po vritet për herë të dytë. "Dy dekada pas atentatit brenda në parlament kundër Azem Hajdarit, atentatori, deputeti i Partisë Socialiste në atë kohë, Gafurr Mazreku propozohet nga Edi Rama për t'i dhënë titullin ' Qytetar Nderi' i Hasit. Partia Demokratike disponon propozimin që kryetari i Bashkisë së Hasit i ka bërë këshillit bashkiak për të nderuar një vrasës si Gafur Mazreku me titullin më të lartë që mund të japë pushteti lokal", theksoi z. Noka. Nderimi i një deputeti që ka përdorur armën brenda sallës së parlamentit kundër Azem Hajdarit për demokratët është modeli që kryeministri ka ndjekur që pas ardhjes në pushtet. "Është modeli që nderon dhe u jep pushtet kriminelëve në parlament, qeveri dhe bashki, siç është rasti i Elvis Roshit, Mark Frrokut, Arben Ndokës dhe të tjerëve si ata. Është modeli që mbron krimin të lidhur me
qeverinë, siç është rasti i Saimir Tahirit dhe Agron e Fatmir Xhafajs", u shpreh deputeti i PD- së. Opozita shprehet se mbledhja e Këshillit Bashkiak të Hasit është ditën e hënë, ndaj i bëjnë thirrje kryeministrit Edi Rama që të tërhiqet
nga vendimi sa nuk është vonë. PD- ja i kërkon kryeministrit të tërhiqet nga vendimi skandaloz sipas së cilit vret për herë të dytë liderin e lëvizjes së dhjetorit, Azem Hajdari. "Mbledhja e këshillit bashkiak është parashikuar për të hënën dhe
ne i bëjmë thirrje Edi Ramës të tërheqë këtë vendim skandaloz sa nuk është vonë, sepse me këtë vendim po vret për herë të dytë liderin e dhjetorit, Azem Hajdari dhe po përdhos demokracinë në këtë vend", deklaroi deputeti i PD- së.