Goditet banda e grabitësve të kasafortave, në pranga 5 persona mes tyre një ish- polic
Sekuestrohen makina, armë, drogë. Ja çfarë i tradhtoi anëtarët e grupit kriminal "Skifterët", autorë të 11 vjedhjeve të bizneseve dhe bankave në 6 qytete
Gjatë orëve të para të mëngjesit të djeshëm policia e Tiranës ka goditur një grup të strukturuar kriminal, duke vënë në pranga pesë persona, mes tyre një ish- oficer policie. Konkretisht anëtarët e këtij grupi nën kërcënimin e armëve vidhnin kasaforta në biznese të ndryshme jo vetëm në Tiranë, por edhe në qytete të tjera të Shqipërisë. Arrestimi i tyre u bë i mundur teksa po tentonin të grabisnin kasafortën e një biznesi të madh në kryeqytet. "Pas një pune disa mujore me metoda speciale hetimi, Sektori i Krimeve të Rënda ndaj Jetës dhe Pronës në D. V. P. Tiranë në bashkëpunim me Komisariatet e Policisë Tiranë dhe nën drejtimin e Prokurorisë së Rrethit Gjyqësor Tiranë finalizoi operacionin policor të koduar "Kasaforta", si rezultat i të cilit u bë kapja dhe arrestimi në flagrancë i shtetasve Saimir Kuçi, 35 vjeç, banues në Tiranë, i dënuar më parë për vjedhje me armë; Elton Lika, 35 vjeç, banues në Tiranë, i dënuar më parë për vjedhje me armë; Valmend Pelivani, 27 vjeç, banues në Tiranë, dënuar më parë për vjedhje; Donald Ahmetaj, 28 vjeç, banues në Tiranë i dënuar më parë për vjedhje; Engrid Hënaj, 31 vjeç, banues në Tiranë, i dënuar më parë për vjedhje",- thuhet në njoftimin e policisë. Një ndër anëtarët e grupit, shtetasi Engrid Hënaj ka qenë ishoficer policie i arrestuar më parë, pasi komunikonte me një person të shpallur në kërkim për vjedhjen e një makine. Grupi që gjuante kryesisht kasafortat e bizneseve u pikas nga policia pas kryerjes së një grabitje
në territorin e komisariatit nr: 2 në kryeqytet. Roja i biznesit, i cili u grabit, lajmëroi policinë dhe dha
përshkrime mbi autorët si dhe mjetin me të cilin lëviznin dhe më pas u bë i mundur neutralizimi i tyre në
rreth- rrotullimin e Saukut nga agjentët e krimit pranë komisariatit nr. 1. Burimet policore konfirmojnë se filli- misht anëtarët e grupit kanë bërë rezistencë, por janë neutralizuar në kohë nga policia.
GRABITJET
Nga hetimet rezulton se ky grup i strukturuar kriminal, në periudha të ndryshme kohore ka vjedhur me armë kasaforta me vlera monetare të bizneseve të ndryshme, jo vetëm në juridiksionin e Drejtorisë Vendore të Policisë Tiranë, por dhe në qytete të tjera të Shqipërisë.
Për realizimin e këtyre ngjarjeve, këta shtetas lëviznin orët e vona të natës të armatosur, përdornin automjete të vjedhura dhe të marra me qira duke u ndihmuar dhe nga persona të tjerë. Nga puna hetimore është bërë i mundur dokumentimi ligjor i disa ngjarjeve të ndodhura në kryeqytet, por dhe në qytete të tjera si Durrës, Kavajë, Laç, Lezhë dhe Berat, konkretisht i 11 ngjarjeve: në datë 02.03 2018 ku është vjedhur me armë filiali bankës Credins në rrugën dytësore Tiranë- Durrës, në datë 12.04.2018 ku në Kamëz Tiranë është vjedhur banesa e shtetasit A. Rr; në datë 15.06.2018 ku në fshatin Vaqarr është vjedhur kasaforta e një mobilierie; në datë 18.06.2018 ku tek ish- qyteti nxënësve në Tiranë është tentuar të vidhet me armë një mobileri; në datë 09.10.2017 ku në qytetin e Kavajës është vjedhur e kasaforta e një firme; në datë 06.01.2018 ku është vjedhur kasaforta e një shoqërie në rrugën "Frederik Shiroka"; në datë 23.12.2017 ku është vjedhur kasaforta e një dyqani në rrugën "Njazi Meka"; në datë 04.06.2018 ku është vjedhur kasaforta e një supermaketi në rrugën "Hysen Xhura"; në datë 26.02.2018 ku është vjedhur kasaforta e një supermarketi në rrugën "Tom Plezha"; në datë 30.01.2017 ku është vjedhur kasaforta e një firme sheqeri në fshatin Picar bashkia Vorë; në datë 06.04.2017 ku është vjedhur kasaforta e një firme në fshatin Ahmetaq bashkia Vorë. Në cilësinë e provës materiale gjatë hetimit të këtyre ngjarjeve janë sekuestruar 3 automjete, 2 armë zjarri, 4 maska, 6 palë doreza pune, 1 palë pranga metalike si ato të policisë, 1 portofol me stemën e policisë, 1 sasi lënde e dyshuar narkotike e llojit heroine, 1 çantë me vegla pune si pinca, kaçavida, 1 gur fresibël që shërben për prerjen e hekurave, veshje të ndryshme, pajisje speciale për hapjen e dyerve të blinduara, 1 vare dhe 6 leva hekuri. Sakaq policia po vijon punën intensive për dokumentimin e plotë ligjor të këtyre ngjarjeve. Materialet do t'i kalojnë për ndjekje të mëtejshme Prokurorisë pranë Gjykatës së Shkallës Parë Tiranë, për veprat penale të "Vjedhjes së bankave dhe arkave të kursimit e kryer ne bashkëpunim", "Vjedhjes me armë", "Prodhim dhe mbajtje pa leje e armëve luftarake e municionit", "Prodhim dhe shitja e lendeve narkotikëve", "Mbajtje pa të drejtë e uniformës" dhe "Kanosjes për shkak të detyrës".