Goditi bashkëshorten me sqepar në kokë dhe në trup, arrestohet 65- vjeçari
Nëna e 3 fëmijëve, Antoneta Myrtaj: Kam frikë se do më vrasë
MEMALIAJ - Një tjetër krim në familje ka ndodhur në jug të vendit. Një 65vjeçar nga Memaliaj ka goditur me sqepar gruan e tij 57- vjeçare, e cila fatmirësisht ka shpëtuar nga vdekja dhe fatmirësisht ndodhet jashtë rrezikut në Spitalin Rajonal "Omer Nishani" të Gjirokastrës. Mësohet se Ferik Myrtaj e ka goditur disa herë të shoqen me sqepar në kokë e trup, por pavarësisht kësaj, policia e ka arrestuar atë për veprën penale "Dhunë në familje". "Nga specialistët për Hetimin e Krimit në Drejtorinë Vendore të Policisë Gjirokastër u bë arrestimi në flagrancë i Ferik Myrtajt, 65 vjeç, banues në Memaliaj. Arrestimi i këtij shtetasi u bë pasi në banesën e tij, për motive të dobëta, ka goditur disa herë me sende të forta ( sqepar) në kokë e trup bashkëshorten A. M., 57 vjeçe, banuese në Memaliaj", thuhet ndër të tjera në njoftimin zyrtar të policisë së Gjirokastrës. Ndërkaq, 57- vjeçarja ka treguar se Feriku nisi ta godiste në mes të rrugës mbrëmjen e së dielës, pasi kishte pirë.
"Më shpëtuan kalimtarët. Iu luta që të mos më qëllonte. Kam frikë se do më vrasë, kur të dalë", u shpreh Antoneta Myrtaj. Ndërkaq, ajo ndihet e frikësuar se çfarë do ndodhë më pas mes saj dhe bashkëshortit. Antoneta tha se kanë tri vajza dhe burri që tashmë ndodhet pas
hekurave iu ka thënë të bijave se ishte penduar. Por edhe pas gjithë atyre vuajtjeve, gruaja akoma pretendon ta falë bashkëshortin dhe nuk e di se çfarë do të bëjë. "Në rini më rrihte, por e duroja, por kjo e fundit i ka kapërcyer limitet", pohoi 56- vjeçarja.